पुणे, ता. १९ : पुणे कृषी उत्पन्न बाजार समितीच्या मुख्य आवारात स्वच्छतेसाठी आधुनिक तंत्रज्ञानाचा वापर सुरू झाला आहे. राज्याचे पणन व राजशिष्टाचार मंत्री जयकुमार रावल यांच्या हस्ते या आधुनिक रस्ता स्वीपिंग मशिनचे उद्‌घाटन करण्यात आले.

या कार्यक्रमाला समितीचे सभापती प्रकाश जगताप, उपसभापती शशिकांत गायकवाड, सचिव डॉ. राजाराम धोंडकर, जिल्हा बँकेचे संचालक विकास दांगट, प्रदीप कंद, माजी सभापती दिलीप काळभोर यांच्यासह समितीचे संचालक, शेतकरी व कर्मचारी उपस्थित होते.

बाजार आवारात दररोज हजारो शेतकरी आणि व्यापारी ये-जा करत असल्याने येथे मोठ्या प्रमाणावर कचरा निर्माण होतो. या पार्श्वभूमीवर अत्याधुनिक रस्ता स्वीपिंग मशिनची खरेदी करून ती स्वच्छता व्यवस्थेसाठी उपलब्ध करून दिली आहे. या यंत्रामुळे साफसफाई जलद, कार्यक्षम आणि परिणामकारक होणार असून, बाजार आवारातील वातावरण स्वच्छ व निरोगी राहणार आहे. यापूर्वी बाजार समितीने कचरा गोळा करण्यासाठी लोडर ट्रॅक्टर खरेदी केला होता. आता या नव्या यंत्रामुळे स्वच्छता प्रक्रियेला अधिक गती मिळणार असल्याचे बाजार समितीचे सचिव डॉ राजाराम धोंडकर यांनी सांगितले.
-----------