अग्रसेन महाराज भारतीय इतिहास आणि संस्कृतीतील महान व्यक्तिमत्त्व होते. ज्यांचे जीवन समाज, मानवता आणि सहकार्याच्या भावनेसाठी समर्पित होते. त्यांचे जीवन केवळ अग्रवाल समाजासाठीच नव्हे तर संपूर्ण भारतीय समाजासाठी प्रेरणेचे स्रोत आहे. त्यांना न्यायप्रिय, दानशूर आणि समाजसुधारक म्हणून ओळखले जाते. अग्रसेन महाराजांनी आपल्या जीवनातून हे सिद्ध केले की, सामाजिक समरसता, सहकार्य आणि सेवा हीच खरी संपत्ती आहे.

जीवनपरिचय
अग्रसेन महाराजांचा जन्म त्रेतायुगाच्या अंतिम टप्प्यात राजा वल्लभ सेन यांच्या घरी झाला. ते सूर्यवंशातील श्रेष्ठ घराण्यातील होते आणि लहानपणापासूनच धर्म, न्याय आणि समाजसेवेच्या शिक्षणाने प्रभावित झाले. महाराज अग्रसेन यांनी केवळ राज्यकारभारच केला नाही, तर समाजातील दुर्बल घटकांच्या कल्याणासाठी अनेक नियमदेखील घालून दिले. त्यांचा विवाह नागकन्या माधवी यांच्याशी झाला, ज्यांनी त्यांच्या जीवनकार्याला सहकार्य आणि मार्गदर्शन दिले. विवाहानंतर अग्रसेन महाराजांनी समाज आणि राज्याच्या उन्नतीसाठी अनेक महत्त्वपूर्ण नीती आणि परंपरा स्थापित केल्या.

सहकार्य आणि समृद्धीचा अद्भुत सिद्धांत
अग्रसेन महाराजांचा सर्वांत प्रेरक संदेश त्यांच्या सहकार्य व परोपकाराच्या सिद्धांतात दडलेला आहे. त्यांनी समाजात असा नियम घातला की, जेव्हा एखादे नवीन कुटुंब समाजात स्थायिक होईल, तेव्हा प्रत्येक कुटुंबाने त्यांना एक वीट आणि एक रुपया द्यावा. वीट घर बांधण्यासाठी मदत करेल. रुपया नव्या आयुष्याची सुरुवात करण्यासाठी साहाय्य करेल. ही फक्त एक सामाजिक परंपरा नव्हती, तर समाजातील सामूहिक सहकार्य, समानता आणि आर्थिक सुरक्षिततेचे प्रतीक होती. हा सिद्धांत आजही अग्रवाल समाजाची ओळख आहे आणि आपल्याला शिकवतो की छोट्या योगदानातूनही मोठे सामाजिक बदल घडवून आणता येतात.

अग्रवाल समाजाची स्थापना
महाराज अग्रसेन यांनी अग्रोहा नगरीची स्थापना केली, जी आज हरियानामध्ये ऐतिहासिक आणि सांस्कृतिक दृष्ट्या महत्त्वाची आहे. हाच नगर पुढे अग्रवाल समाजाचे केंद्र बनले. त्यांनी समाजाच्या रचनेसाठी १८ गोत्रांची स्थापना केली, जी आजही अग्रवाल समाजात प्रचलित आहेत. या गोत्रांनी समाजात समानता आणि आपसी सहकार्याची भावना बळकट केली.

अग्रसेन महाराजांचे आदर्श
अग्रसेन महाराजांनी समाज आणि राज्यकारभारात अनेक असे मूल्य रुजवले जे आजही तितकेच महत्त्वाचे आहेत :
१. समानता ः जात, धर्म आणि लिंग यांच्या आधारावर कोणत्याही प्रकारच्या भेदभावाला विरोध.
२. अहिंसा ः हिंसेचा त्याग करून शाकाहार आणि शांततापूर्ण जीवनशैलीचा स्वीकार.
३. न्यायप्रियता ः शासनामध्ये सर्वांसाठी समान न्यायव्यवस्था.
४. समरसता आणि सहकार्य ः समाजाचा विकास एकतेतून आणि सहकार्यातूनच शक्य आहे.
५. परिश्रम आणि उदारता ः मेहनत आणि परोपकार हीच आयुष्याची खरी संपत्ती आहे.

आजच्या काळातील प्रासंगिकता
आजचा समाज असमानता, बेरोजगारी आणि सामाजिक तुटण्या-सारख्या आव्हानांना सामोरे जात आहे. अशा वेळी अग्रसेन महाराजांचे आदर्श आणि सिद्धांत फारच प्रासंगिक आहेत. जर समाजात हा नियम अंगीकारला गेला की नव्या कुटुंबांना किंवा गरजूंना सामूहिक सहकार्य मिळावे, तर गरीबी आणि बेरोजगारीत मोठी घट होऊ शकते. त्यांचा अहिंसा आणि समरसतेचा संदेश आधुनिक काळात शांती, बंधुभाव आणि सामाजिक स्थैर्य मजबूत करण्याचा मार्ग दाखवतो.

सेवा, त्याग आणि समाजाची प्रेरणा
अग्रसेन महाराज हे केवळ अग्रवाल समाजासाठीच नव्हे तर संपूर्ण भारतासाठी प्रेरणास्थान आहेत. त्यांचे जीवन शिकवते की, सहकार्य आणि सेवा हीच खरी संपत्ती आहे. समाजाच्या प्रगतीसाठी आपल्याला वैयक्तिक स्वार्थापेक्षा वर उठून कार्य करावे लागेल. समान संधी, समान सन्मान आणि समान न्याय हेच समाजाला स्थायी समृद्धी आणि शांती प्रदान करू शकतात. अग्रसेन जयंतीच्या दिवशी आपण हा संकल्प करावा की, त्यांच्या सिद्धांतांना आपल्या जीवनात उतरवून असे समाज घडवू, जिथे समानता, न्याय, सहकार्य आणि शांती सर्वोच्च मूल्ये असतील.