पुणे, ता. २२ : रूबी हॉल क्लिनिकने जागतिक सेप्सिस दिनानिमित्त सेप्सिसच्या लवकर निदान आणि व्यवस्थापन यासाठी शैक्षणिक आणि जागरूकता उपक्रमांचे आयोजन केले होते. या कार्यक्रमात डॉक्टर, आरोग्य सेवा कर्मचारी, रुग्ण हे एकत्र आले होते. या कार्यक्रमाला पुण्याच्‍या रूबी हॉल क्लिनिक येथील फिजिशियन आणि विश्वस्त डॉ. सायमन ग्रँट, मुख्य कामकाज अधिकारी उर्वाकाश भोटे आणि आयसीयूच्या सल्लागार भूलतज्‍ज्ञ डॉ. तनिमा बारोनिया यांची विशेष उपस्थिती होती.
या कार्यक्रमाचे मुख्य आकर्षण डॉक्टर्स आणि आरोग्य सेवा व्यावसायिकांसाठी एक शैक्षणिक सीएमई सत्र होते. यामध्‍ये सेप्सिसच्या काळजीमधील नवीन अद्ययावत व पुरावा-आधारित पद्धती आणि वेळेवर हस्तक्षेपासाठीच्या रणनीतींवर लक्ष केंद्रित केले गेले. ‘आयसीयू’च्‍या पथकाने समुदायापर्यंत माहिती पोहोचविण्याच्‍या दृष्‍टीने प्रयत्‍न केले. तसेच सेप्सिस प्रतिबंध, लवकर निदान आणि वेळेवर वैद्यकीय मदत घेण्याच्या महत्त्वाविषयी माहिती दिली.