पुणे, ता. २३ : सावित्रीबाई फुले पुणे विद्यापीठाच्या शैक्षणिक वर्ष २०२५-२६ हिवाळी सत्राच्या परीक्षांचे अर्ज भरण्याची प्रक्रिया सुरू झाली आहे. हिवाळी सत्र परीक्षांचे अर्ज नियमित शुल्कासह विद्यार्थ्यांना बुधवारपर्यंत (ता. २४), तर अतिविलंब शुल्कासह विद्यार्थ्यांना सोमवारपर्यंत (ता. २९) भरता येणार आहेत, अशी माहिती विद्यापीठाच्या परीक्षा व मूल्यमापन मंडळाचे प्रभारी संचालक डॉ. प्रभाकर देसाई यांनी दिली आहे.
हिवाळी सत्राच्या परीक्षेचे अर्ज भरण्याची प्रक्रिया विद्यापीठाने १५ सप्टेंबरपासून सुरू केली आहे. यंदा विद्यापीठाने सात वर्षांनंतर विद्यापीठाच्या परीक्षाशुल्कात वाढ केली आहे. हिवाळी सत्र परीक्षेसाठी नियमित शुल्कासह विद्यार्थ्यांना २४ सप्टेंबरपर्यंत अर्ज करता येणार आहे. महाविद्यालयांना विद्यार्थ्यांचे परीक्षा अर्ज कायम करण्यासाठी अर्ज २५ सप्टेंबरपर्यंत मुदत दिली आह, तर विलंब शुल्कासह विद्यार्थ्यांना २६ सप्टेंबरपर्यंत अर्ज भरता येणार आहे. त्यानंतर महाविद्यालयांना २७ सप्टेंबरपर्यंत विद्यार्थ्यांचे विलंब शुल्कासह आलेले अर्ज अंतिम करावा लागणार आहेत, तर अतिविलंब शुल्कासह विद्यार्थ्यांना २९ सप्टेंबरपर्यंत अर्ज करता येणार आहे. महाविद्यालयांना हे अतिविलंब शुल्कासह आलेले अर्ज ३० सप्टेंबरपर्यंत अर्ज अंतिम करायचे आहेत, असे डॉ. देसाई यांनी परिपत्रकाद्वारे स्पष्ट केले आहे.