पुणे, ता. २४ : सिंबायोसिस आंतरराष्ट्रीय अभिमत विद्यापीठातील १९ प्राध्यापक आणि एक प्रॅक्टिसचे प्राध्यापक यांचा समावेश ‘स्टॅनफोर्ड’ विद्यापीठाच्या जागतिक सर्वोत्कृष्ट दोन टक्के वैज्ञानिकांच्या यादीत झाला आहे.
ही यादी ‘स्टॅनफोर्ड’ विद्यापीठ आणि ‘एलसिव्हीयर’ यांनी ‘स्कोपस डेटा’वर (डिसेंबर २०२४ पर्यंत) आधारित आहे. यात जगभरातील ८० लाखांहून अधिक वैज्ञानिकांचे मूल्यांकन करण्यात आले असून, २२ विज्ञान आणि १७४ उपक्षेत्रे यांचा समावेश आहे. यंदा या यादीत भारतातील सहा हजार २३९ वैज्ञानिकांचा समावेश आहे. ही यादी संशोधनातील प्रभाव, सायटेशन आणि इतर वैज्ञानिक निकषांवर आधारित आहे. सिंबायोसिस विद्यापीठाच्या प्र-कुलपती डॉ. विद्या येरवडेकर म्हणाल्या, ‘‘ही मान्यता सिंबायोसिसमधील संशोधकांचा जागतिक विज्ञान, तंत्रज्ञान आणि नवकल्पना क्षेत्रातील प्रभाव दर्शवते.’’
या यादीत सिंबायोसिसमधील पवन बुढवार, जसजित सुरी, रामकृष्णन रमण, केतन कोटेचा, दीपाशा शर्मा, दीपक जैन, कृती गुप्ता, व्ही. जी. वेंकटेश, धन्या प्रामोद, राजेश धनराज, श्रुती पाटील, शैलेश रस्तोगी, सुमन त्रिपाठी, पी. अशोक, शिल्पा गीते, अनिल जाधव, सुमीत कुमार, अशोक कुमार यादव, अखिल गुप्ता, संदीप साळवी (प्रॅक्टिसचे प्राध्यापक) यांचा समावेश आहे.