पुणे, ता. २५ : राज्यातील वैद्यकीय शिक्षण आणि औषधी द्रव्ये विभागाच्या आधिपत्याखालीच शासकीय आणि दंत महाविद्यालय, संलग्नित रुग्णालयांमधील गट-क तांत्रिक आणि अतांत्रिक संवर्गातील रिक्त पदे भरण्यासाठी सुरू असलेल्या राज्यस्तरीय ऑनलाइन स्पर्धा परीक्षा पुढे ढकलण्याचा आदेश वैद्यकीय शिक्षण राज्यमंत्री माधुरी मिसाळ यांनी दिला आहे.
राज्यातील अनेक भागांत मागील आठवड्यापासून सुरू असलेल्या मुसळधार पावसामुळे पूरस्थिती निर्माण झाली आहे. या आपत्कालीन परिस्थितीमुळे परीक्षा पुढे ढकलण्याचा निर्णय घेण्यात आला आहे. पावसामुळे विद्यार्थ्यांना परीक्षा केंद्रावर पोहोचणे जिकिरीचे आणि अडचणीचे ठरत आहे. या अनुषंगाने सर्व परीक्षार्थीचे होणारे नुकसान टाळण्यासाठी तत्काळ परीक्षा पुढे ढकलण्याचा आदेश दिला आहे. वैद्यकीय शिक्षण आणि आयुष आयुक्तालयाने जाहीर केलेल्या सूचनेनुसार गुरुवारी (ता. २५) आणि शुक्रवारी (ता. २६) या कालावधीत होणाऱ्या परीक्षांचे वेळापत्रक बदलण्यात आले आहे. या संदर्भातील सुधारित वेळापत्रक लवकरच प्रसिद्ध केले जाणार असल्याचे आयुक्तालयाने स्पष्ट केले आहे. परीक्षार्थींना अधिकृत संकेतस्थळावर अद्ययावत माहिती तपासत राहावी, असे आवाहन आयुक्तालयाने केले आहे.