पुणे, ता. २६ ः शिखांचे नववे गुरू श्री गुरू तेग बहादूर साहीब यांच्या ३५०व्या शहीद दिवसानिमित्त शताब्दी यात्रेचे आयोजन करण्यात आले आहे. बुधवारी (ता. १) ही यात्रा पुण्यात येणार असल्याची माहिती गुरुद्वारा गुरुनानक दरबारचे अध्यक्ष चरणजितसिंग सहानी यांनी शुक्रवारी पत्रकार परिषदेत दिली.
बुधवारी दुपारी चार वाजता ही यात्रा देहूरोड येथील गुरुद्वारा सिंह सभा येथे पोहोचणार आहे. त्यानंतर नगर कीर्तनाच्या स्वरूपात आकुर्डी येथील गुरुद्वारा मानसरोवर येथे पोहोचणार असून तेथे मुक्काम करणार आहे. त्यानंतर गुरुवारी (ता. २) सकाळी पिंपरी बाजार येथून यात्रा पुढे जाणार असून खडकी येथे गुरुद्वारा सिंह सभा येथे लंगर सेवेसाठी थांबणार आहे. तेथून यात्रा गुरुद्वारा दशमेश दरबार आणि साधू वासवानी मिशनमार्गे कॅम्प येथील गुरुद्वारा गुरू नानक दरबारपर्यंत कीर्तनाच्या स्वरूपात जाणार असल्याचे चरणजितसिंग सहानी यांनी सांगितले. ‘‘गुरू तेग बहादूर साहीब जी यांच्या सर्वोच्च हौतात्म्याबद्दल जागरूकता निर्माण करण्यासाठी जागतिक स्तरावर विविध आध्यात्मिक कार्यक्रमांचे आयोजन केले जात आहे. ही शताब्दी यात्रा त्याचाच भाग आहे,’’ असे सहानी म्हणाले.