पुणे, ता. २७ ः ‘‘साठच्या दशकात तत्कालीन समाजव्यवस्थेच्या रचनेनुसार स्त्रियांना व्यक्त होण्यास मर्यादा होत्या. मासिकांमधील कथांच्या माध्यमातून स्त्रिया त्यांच्या वेदना, आकांक्षा आणि कुचंबणेवर बोलू लागल्या. या कथा या स्त्रियांचा हुंकार ठरल्या,’’ असे मत ज्येष्ठ लेखिका मंगला गोडबोले यांनी व्यक्त केले.
दिवंगत लेखिका जयश्री आलूरकर लिखित ‘कथांजली’ या कथासंग्रहाचे प्रकाशन गोडबोले यांच्या हस्ते झाले, त्या वेळी त्या बोलत होत्या. याप्रसंगी अखिल भारतीय मराठी साहित्य महामंडळाचे अध्यक्ष प्रा. मिलिंद जोशी, ‘मनशक्ती’ मासिकाच्या संपादक प्रा. डॉ. वर्षा तोडमल, जयश्री आलूरकर यांच्या कन्या मेधा कुलकर्णी, जावई शिरीष कुलकर्णी, पुत्र दीपक आलूरकर उपस्थित होते.
‘‘मासिकांनी कथाकार घडविण्याचे काम केले,’’ असे प्रा. जोशी यांनी सांगितले. पालवी दामले यांनी कथासंग्रहातील काही भागाचे अभिवाचन केले. स्नेहल दामले यांनी सूत्रसंचालन केले. दीपक आलूरकर यांनी आभार मानले.