पुणे, ता. २७ : आर्यन्स वर्ल्ड स्कूलमध्ये ‘एक्सप्रेशन्स-२०२५’ हा शिक्षकांचा स्नेहमेळावा पार पडला. मेळाव्यात सर्व शाखांमधील ७०० हुन अधिक शिक्षिका व शिक्षक सहभागी झाले होते. यानिमित्ताने शिक्षकांना त्यांच्या दैनंदिन दिनचर्येतून वेळ काढून कला आणि कौशल्ये सादर करण्याची संधी मिळाली. विविध सादरीकरण, उपक्रम आणि उत्साही वातावरणात मेळावा पार पडला. ‘हा स्नेहमेळावा कायम लक्षात राहील. हा सोहळा केवळ एक उत्सव नव्हता तर आमच्या शिक्षकांसाठी विश्रांती आणि आनंदाचा दिवस ठरला, त्याचे कठोर परिश्रम, निष्ठा आणि मुलांच्या घडवणुकीत असलेल्या महत्त्वपूर्ण भूमिकेबद्दल कृतज्ञता व्यक्त करण्यात आली. शिक्षक केवळ मार्गदर्शक म्हणूनच नव्हे तर मित्र, कलाकार आणि आर्यन्स वर्ल्ड स्कूल परिवार म्हणून एकत्र आले’, असे संस्थेचे अध्यक्ष मिलिंद लाडगे यांनी नमूद केले.