पुणे, ता. २८ : एकात्मिक बाल विकास सेवा योजनेअंतर्गत १६ ऑक्टोबरपर्यंत राष्ट्रीय पोषण महिना साजरा करण्यात येत आहे. यामध्ये लठ्ठपणा नियंत्रण, प्रारंभिक बालसंगोपन आणि शिक्षण, बालक व लहान मुलांच्या आहार पद्धती, पालकांचा सहभाग आणि लोकल इज व्होकल या संकल्पनांचा समावेश आहे.
पुणे शहरातील एकात्मिक बालविकास प्रकल्पांतर्गत अंगणवाडी केंद्रे, शाळा आणि महापालिकेच्या सार्वजनिक उद्यानांमध्ये बालक-पालक मेळावे घेण्यात येणार आहेत. मुलांसाठी खेळांच्या माध्यमातून मार्गदर्शन, तर पालकांसाठी योग्य पालकत्व व बालसंगोपन याचे प्रशिक्षण दिले जाणार आहे. या कार्यक्रमामध्ये पालकांचा सक्रिय सहभाग महत्त्वाचा असणार आहे. ज्यामुळे मुलांचा आत्मविश्वास, मेंदूचा विकास आणि कुटुंबातील नातेसंबंध अधिक मजबूत होतील, असा विश्वास प्रशासनाला आहे. योग्य आहार, खेळ, प्रेमळ संवाद आणि संयुक्त संगोपन ही मुलांच्या आनंदी व निरोगी भविष्यासाठी खरी पायाभरणी असल्याचा संदेश या माध्यमातून दिला जाणार आहे, अशी माहिती बाल विकास प्रकल्प अधिकारी मनीषा बिरारीस यांनी सांगितले.