पुणे, ता. २८ : गुन्हे शाखेच्या पथकाने कोंढवा परिसरात मेफेड्रोनची विक्री करणाऱ्या नायजेरियन नागरिकाला अटक केली. त्याच्याकडून १२ लाख ४४ हजार रुपयांचे ६२ ग्रॅम मेफेड्रोन, दोन मोबाईल आणि दुचाकीसह १२ लाख ९४ हजार रुपयांचा मुद्देमाल जप्त केला.
व्हॅलेंटाइन ऊर्फ जेम्स अमुचे ईझेजा (वय ३५, सध्या रा. येवलेवाडी, कोंढवा, मूळ रा. नायजेरिया) असे अटक केलेल्याचे नाव आहे. अमली पदार्थविरोधी पथकाचे अधिकारी २६ सप्टेंबरला गस्तीवर असताना कोंढवा परिसरात रस्त्यावर व्हॅलेंटाइन हा दुचाकीवर संशयास्पद अवस्थेत थांबलेला आढळला. पोलिसांनी विचारपूस केली असता तो उडवाउडवीची उत्तरे देऊ लागला. त्याची झडती घेतली असता त्याच्याकडे ६२ ग्रॅम मेफेड्रोन आढळून आले. त्याच्याविरुद्ध कोंढवा पोलिस ठाण्यात एनडीपीएस कायद्यान्वये गुन्हा दाखल झाला आहे.