पुणे, ता. ३० : नवरात्रोत्सवाच्या निमित्ताने कॅम्प एज्युकेशन सोसायटीच्या डॉ. सायरस पूनावाला कन्या शाळेत भोंडल्याद्वारे स्त्रीच्या आरोग्याचा जागर करण्यात आला. उपस्थितांच्या हस्ते श्री सरस्वती देवीचे आणि हत्तीच्या मूर्तीचे पूजन आणि आरती करण्यात आली. तसेच गुणवंत विद्यार्थिनी आणि शिक्षकांचा सन्मान करण्यात आला.
याप्रसंगी सोसायटीच्या कार्यकारिणी सदस्य डॉ. प्रवदा तेलंग, सिरम इन्स्टिट्यूट इंडिया, पुणेचे क्षेत्र व्यवसाय व्यवस्थापक कृष्णा हेगडे आणि टेरिटरी बिझनेस मॅनेजर महेश गद्रे आदी उपस्थित होते. महिलांच्या सर्वाइकल कॅन्सर या गंभीर आजाराविषयी डॉ. तेलंग यांनी व्याख्यानातून मुलींमध्ये जागरूकता निर्माण केली. हेगडे आणि गद्रे यांनी या कॅन्सरला प्रतिबंध करण्यासाठी प्रत्येक महिलेने, मुलीने लस घेणे अनिवार्य असल्याचे नमूद केले. ही लस माफक किमतीमध्ये शाळेतील मुलींना आम्ही उपलब्ध करून देऊ, असेही आश्वासन त्यांनी दिले. याप्रसंगी मुख्याध्यापिका मनीषा बडदाळ, उपमुख्याध्यापिका आशा धेंडे उपस्थित होत्या. सूत्रसंचालन संगीता शेलार यांनी केले. पाहुण्यांचा परिचय निर्मला लाड यांनी करून दिला तर सुनीता जगताप यांनी आभार मानले.