पुणे, ता. ३ ः दसऱ्याच्या शुभमुहूर्तावर पुणेकरांनी यंदा वाहन खरेदीत मोठा उत्साह दाखवला. प्रादेशिक परिवहन कार्यालयाने (आरटीओ) दिलेल्या माहितीनुसार २१ ते २९ सप्टेंबरदरम्यान नऊ हजार ५३१ नव्या वाहनांची नोंदणी झाली आहे.

वाहनखरेदीत पाच हजार ४३८ दुचाकी, दोन हजार ५५४ चारचाकी गाड्या, तसेच ३६१ मालवाहतूक वाहने, १९१ पर्यटन टॅक्सी, ६९ रिक्षा, १७ बस आणि ८७ इतर वाहनांचा समावेश आहे. त्याचबरोबर यावर्षी इलेक्ट्रिक वाहनांचीही लक्षणीय भर पडली आहे. यावर्षी ८१४ नव्या ई-वाहनांची नोंदणी झाली असून, त्यामध्ये ६७९ ई-दुचाकी, ११६ ई-कार, ८ ई-टॅक्सी, ७ मालवाहतूक वाहने आणि ४ ई-रिक्षांचा समावेश आहे. दसऱ्याच्या निमित्ताने वाहन खरेदी करण्याची परंपरा पुणेकरांनी यंदाही कायम ठेवली. नोंदणी सुरळीत पार पाडण्यासाठी ‘आरटीओ’ अधिकारी आणि कर्मचाऱ्यांनी विशेष तयारी केली होती.
----------
यावर्षी दसऱ्याच्या शुभमुहूर्तावर पुणेकरांनी इलेक्ट्रिक वाहनांना मोठी पसंती दिली आहे. नोंदणी झालेल्या एकूण ९ हजार ५३१ नवीन वाहनांपैकी तब्बल ८१४ ई-वाहने नोंदणीकृत झाली आहेत. पुणेकरांचा पर्यावरणाभिमुख दृष्टिकोन या आकडेवारीतून स्पष्ट दिसतो.
-स्वप्नील भोसले, उपप्रादेशिक परिवहन अधिकारी, पुणे
-------------------
नोंदणीकृत झालेली वाहने
दुचाकी ५४३८
चारचाकी २५५४
रिक्षा ६९
मालवाहतूक वाहने ३६१
पर्यटन टॅक्सी १९१
बस १७
इतर वाहन ८७
------------------------
एकूण ८७१७
---------------------
नोंदणीकृत झालेली ई-वाहने
ई-दुचाकी ६७९
ई-कार ११६
ई-टॅक्सी ८
ई-मालवाहतूक वाहने ७
ई-रिक्षा             ४
-----------------------
एकूण ८१४