पुणे, ता. २६ : लष्‍कराच्‍या आर्म फोर्सेस मेडिकल कॉलेजच्या (एएफएमसी) बायोकेमिस्ट्री विभागातर्फे बी. जे. शासकीय वैद्यकीय महाविद्यालय आणि पुण्यातील इतर वैद्यकीय महाविद्यालयांच्या सहकार्याने ‘ट्रान्सफॉर्मिंग बायोकेमिस्ट्री; इनरिचिंग ऑटोमेशन अँड आर्टिफिशियल इंटेलिजन्स’ या विषयावर राज्यस्तरीय वैद्यकीय शिक्षण परिषद (सीएमई) पार पडली. ही परिषद असोसिएशन ऑफ मेडिकल बायोकेमिस्ट्स ऑफ इंडियाच्‍या महाराष्ट्र राज्य शाखेच्या अधिवेशनाचा एक भाग होती.
ही परिषद २३ ते २५ ऑक्टोबर दरम्यान ‘मूलभूत जैविक अणूचे तंत्रे’ या विषयावरील प्रात्यक्षिक व कार्यशाळेने झाली. यावेळी महाराष्ट्रासह शेजारील राज्यांतील ५० हून अधिक प्रतिनिधींनी सहभाग नोंदविला. वैज्ञानिक अधिवेशनाचे उद्‍घाटन ‘एएफएमसी’चे अधिष्ठाता व कार्यवाह कमांडंट मेजर जनरल अतुल सेठ यांच्या हस्ते झाले.
या वेळी मुंबईतील कोकिळाबेन धीरूभाई अंबानी रूग्णालयाचे प्रयोगशाळा तज्ज्ञ डॉ. बर्नाली दास यांचे व्याख्यान झाले. देशातील नामांकित तज्ज्ञांनी प्रयोगशाळा निदान प्रक्रियेत ऑटोमेशन व कृत्रिम बुद्धिमत्ता (एआय) यांचा समावेश कसा करता येईल, यावर चर्चा केली. तंत्रज्ञानाच्या प्रगतीबरोबर मानवी विचारशक्तीचे नेतृत्व कायम राहिले पाहिजे, हा संदेश या परिषदेतून देण्यात आला.