पुणे, ता. ५ : लग्नानंतर सतत सुरू राहिलेल्या वादामुळे वैचारिक मतभेद वाढत गेले आणि अखेर पती-पत्नीने परस्पर संमतीने वेगळे होण्याचा निर्णय घेतला. न्यायालयाने सहा महिन्यांचा समजुतीचा कालावधी (कुलिंग ऑफ पिरीयड) रद्द करून या दांपत्याचा घटस्फोटाचा अर्ज मंजूर केला आहे. हा निकाल कौटुंबिक न्यायालयाचे न्यायाधीश बी. डी. कदम यांनी दिला.
पुष्पा ही परिचारिका असून अशोक (नाव बदललेली) वाहनचालक आहे. त्याचा २०२० मध्ये विवाह झाला होता. लग्नानंतर काही दिवसांतच त्यांच्यात मतभेद सुरू झाले. वैचारिक मतभेद इतके तीव्र झाले की, २०२२ पासून दोघे वेगळे राहू लागले. दोन्ही कुटुंबांनी त्यांना एकत्र आणण्याचा प्रयत्न केला, मात्र तो अयशस्वी ठरला. दीर्घकाळ सुरू असलेल्या मतभेदांमुळे अखेर दोघांनी परस्पर संमतीने घटस्फोट घेण्याचा निर्णय घेतला. ॲड. सौरभ माने यांच्यामार्फत कौटुंबिक न्यायालयात अर्ज दाखल करण्यात आला होता.