पुणे, ता. ८ : कोथरूड गोळीबार प्रकरणातील फरार आरोपी नीलेश घायवळ टोळीतील सराईत गुन्हेगाराला खंडणी विरोधी पथकाने ठाणे जिल्ह्यातून अटक केली आहे. जयेश कृष्णा वाघ (वय ३६, रा. विठ्ठल मंदिरासमोर, केळेवाडी, कोथरूड) असे अटक केलेल्याचे नाव आहे.
कोथरूड गोळीबार प्रकरणात नीलेश घायवळसह साथीदारांवर महाराष्ट्र संघटित गुन्हेगारी नियंत्रण कायद्यान्वये (मकोका) कारवाई करण्यात आली आहे. त्यानंतर वाघ फरार झाला होता. ठाणे जिल्ह्यातील टिट‌वाळा परिसरात असलेल्या कोंडारी गावात तो वास्तव्यास असल्याची माहिती खंडणी विरोधी पथकातील पोलिस कर्मचारी राजेंद्र लांडगे यांना मिळाली. त्यानंतर पोलिसांच्या पथकाने कोंडारी गावातून वाघला ताब्यात घेतले. वरिष्ठ पोलिस निरीक्षक अश्विनी जगताप, सहायक निरीक्षक राजेश माळगावे, पोलिस कर्मचारी अमोल आवाड, राजेंद्र लांडगे, सयाजी चव्हाण, नितीन कांबळे, अमर पवार, नितीन बोराटे, अविनाश कोंडे, बबलू मांढरे आणि नागनाथ राख यांनी ही कारवाई केली.