पुणे, ता. १३ ः मराठवाड्यातील पूरग्रस्त शेतकऱ्यांच्या मदतीसाठी ‘शिवाजी अंडरग्राउंड इन भीमनगर मोहल्ला’ या नाटकाच्या दोन प्रयोगांचे आयोजन करण्यात आल्याची माहिती नाटकाचे निर्माते राहुल भंडारे आणि दिग्दर्शक संभाजी तांगडे यांनी गुरुवारी पत्रकार परिषदेत दिली. याप्रसंगी एकलव्य फाउंडेशनचे किशोर सरदेसाई उपस्थित होते. या प्रयोगांमधील एक प्रयोग २३ नोव्हेंबरला सायंकाळी ६.३० वाजता बारामतीतील ग. दि. माडगूळकर सभागृहात होणार आहे. दुसरा प्रयोग २४ नोव्हेंबरला सायंकाळी ६.३० वाजता पुण्यातील स्वारगेट परिसरातील गणेश कला क्रीडा मंच येथे होणार आहे. या प्रयोगांना लोकराजा राजर्षी छत्रपती शाहू महाराज जयंती महोत्सव समिती, पुणे आणि एकलव्य फाउंडेशन, पुणे यांचे सहकार्य लाभले आहे. दोन्ही प्रयोगांच्या तिकीट विक्रीतून जमलेली रक्कम शेतकऱ्यांना मदत म्हणून दिली जाणार आहे, असे भंडारे यांनी सांगितले.