पुणे दि. ११ ः ‘‘पत्रकारिता हा इतिहास लेखनाचा पहिला खर्डा आहे. तसेच पत्रकारितेला धावपळीचे साहित्य म्हटले जाते, असे असले तरी पत्रकारितेच्या माध्यमातून केलेले लेखन, त्यासाठी घेतलेले कष्ट यांतून एक आशयघन साहित्य निर्माण होऊ शकते. सुमीत डेंगळे यांचे ‘ऐतिहासिक वाडे आणि घराणी’ हे पुस्तक त्याचा वस्तुपाठ आहे,’’ असे मत सावित्रीबाई फुले पुणे विद्यापीठाच्या संज्ञापन व वृत्तपत्रविद्या विभाग प्रमुख डॉ. संजय तांबट यांनी व्यक्त केले.
सकाळ प्रकाशन प्रकाशित आणि सुमीत डेंगळे लिखित ‘ऐतिहासिक वाडे व घराणी’ या पुस्तकाच्या दुसऱ्या आवृत्तीचे प्रकाशन नुकतेच झाले. यावेळी डॉ. तांबट, माजी विभाग प्रमुख डॉ. उज्ज्वला बर्वे, सकाळ प्रकाशनाचे सल्लागार संपादक माधव गोखले आदी उपस्थित होते.
बर्वे म्हणाल्या, ‘‘हे पुस्तक अक्षरवाङ्‍मय आहे. उत्तर नगर जिल्ह्यातील विविध घराण्यांच्या वारश्यांची नोंद या पुस्तकात झाली आहे, ही अत्यंत महत्त्वाची गोष्ट आहे. विषयाचा ध्यास घेऊन, लेखनाला तरुणवयात पूर्ण वेळ वाहून घेतलेल्या या कामाला नक्कीच संदर्भ मूल्य आहे. इतिहास लेखन ही जबाबदारी आहे, त्याचे अवसान आणता येत नाही. इतिहास या विषयाचे शिक्षण घेतलेलं नसतानाही या विषयावर लिहिणे ही महत्त्वाची गोष्ट आहे.’’ डेंगळे यांनी ‘मास्टर्सचा प्रोजेक्ट ते पुस्तक’ या विषयावर संवाद साधला. सकाळ प्रकाशनाच्या अमृता देसर्डा यांनी प्रास्ताविक केले. वृषाली बर्गे यांनी आभार मानले. शिवम यांनी सूत्रसंचालन केले.