पुणे, ता. १२ ः पुण्याचे अतिरिक्त जीएसटी आयुक्त अन्वेष चॅटर्जी यांनी तयार केलेल्या ‘कथाकार की डायरी’ या चित्रपटाची प्रतिष्ठेच्या आंतरराष्ट्रीय न्यूयॉर्क चित्रपट महोत्सवासाठी निवड झाली आहे. प्रशासकीय सेवेत असताना आपली आवड जोपासत हा चित्रपट तयार केलेल्या चॅटर्जी यांच्या प्रयत्नांची यानिमित्ताने आंतरराष्ट्रीय पातळीवर दखल घेण्यात आली आहे.
मूळचे ओडिशाचे असलेले चॅटर्जी यांना लहानपणापासूनच विविध कलांमध्ये रस होता. त्यांनी काही काळ जाहिरात क्षेत्रात लेखक म्हणूनही काम करताना विविध कॉर्पोरेट लघुपटांची निर्मितीही केली. कोरोनानंतरच्या काळात त्यांनी ‘कथाकार की डायरी’ या चित्रपटाची निर्मिती केली. या चित्रपटाचे लेखन व दिग्दर्शन चॅटर्जी यांनीच केले असून मित्रांच्या मदतीने निर्मिती केली आहे.
दिवसभर कार्यालयीन काम आणि रात्री चित्रीकरण, असे करत चॅटर्जी यांनी हा चित्रपट पूर्ण केला. या चित्रपटासाठी त्यांना पुण्यातील भारतीय चित्रपट आणि दूरचित्रवाणी संस्थेच्या (एफटीआयआय) तंत्रज्ञांनी मदत केली, तसेच प्रसिद्ध संकलक असीम सिन्हा यांनी या चित्रपटाचे संकलन केले आहे. कपिल भागवत, योगेश जाधव, आरोही चॅटर्जी आदींनी यात अभिनय केला आहे.