- वृषभ प्रदीप पासलकर (वय ३०), नातूबाग मित्रमंडळ
लहानपणापासूनच म्हणजे अगदी ९-१० वर्षांचा असल्यापासून, मी माझ्या वडिलांसोबत नातूबाग मित्रमंडळात जात असे. त्यावेळी छोट्या-छोट्या कामांत उत्साहाने सहभागी व्हायचो. आमची ही दुसरी पिढी असून आम्ही पूर्णवेळ मंडळासाठी कार्य करतो. आता मंडळाचा खजिनदार म्हणून जबाबदारी सांभाळत आहे. बँकिंग क्षेत्रात शिक्षण व नोकरी असल्यामुळे मंडळाचा खर्च, वर्गणी, बॅलन्सशीट आणि एफडी यांसारखी आर्थिक कामे नीट सांभाळणे माझ्यासाठी सोयीचे ठरते. मंडळाला मिळालेला प्रत्येक रुपया अचूक व योग्य पद्धतीने सत्कर्मी लागावा, हा माझा कटाक्ष असतो. अगदी आगरबत्ती-कपूरपासून ते मोठ्या खर्चापर्यंत सर्व गोष्टींचा मी नीट हिशोब ठेवतो.
मंडळामार्फत सामाजिक उपक्रमही राबवले जातात. पर्यावरण जनजागृती, स्वच्छता मोहिमा, महिलांची सुरक्षा, रक्तदान शिबिर तसेच स्पर्धा परीक्षांची तयारी करणाऱ्या विद्यार्थ्यांना वाचन व अभ्यासासाठी जागा, वीज-पाणी यांसारख्या सुविधा उपलब्ध करून देण्याचे काम मंडळामार्फत करायला मिळते. मंदिराची आणि मंडळाच्या डागडुजीचे काम सुरु आहे. दरवर्षी केलेली सेवा एक नवीन अनुभव, संधी आणि ऊर्जा घेऊन येते. डिजिटल पद्धतीने मंडळाचे कामकाज पुढे नेण्यावरही माझा भर आहे.