पुणे, ता. १४ : ‘‘विद्यार्थ्यांनी केलेल्या कामगिरीचे कौतुक आणि त्यांच्या भविष्याला दिशा देण्यासाठी गुणवंतांचा गौरव उपयुक्त ठरतो. त्यातून त्यांच्यामध्ये आत्मविश्वास, जबाबदारीची भावना व सेवाभावी वृत्तीची जोपासना होण्यास मदत होते,’’ असे प्रतिपादन सूर्यदत्त एज्युकेशन फाउंडेशनचे संस्थापक अध्यक्ष प्रा. डॉ. संजय बी. चोरडिया यांनी केले.
सूर्यदत्त कॉलेज ऑफ फार्मसी, हेल्थकेअर अँड रिसर्च (एससीपीएचआर) व नॅशनल फार्मसी वेल्फेअर असोसिएशन (एनपीडब्ल्यूए) यांच्या संयुक्त विद्यमाने ‘फार्मोत्सव २०२५’ सोहळ्यात प्रा. डॉ. चोरडिया बोलत होते. फार्मसी कौन्सिल ऑफ इंडियाचे सदस्य विजय पाटील, पुणे प्रादेशिक तंत्रशिक्षण विभागाचे सहसंचालक डॉ. डी. व्ही. जाधव, फाउंडेशनच्या उपाध्यक्षा सुषमा चोरडिया, ‘एनपीडब्ल्यूए’चे सहसाचिव प्रा. प्रवीण जावळे आदी उपस्थित होते. कार्यक्रमात प्रा. पोपट जाधव यांना डॉ. एच. एम. कदम स्मृती पुरस्कार, डॉ. राजेंद्र पाटील व प्रा. सचिन इटकर यांना ‘एनपीडब्ल्यूए आयडॉल पुरस्कार’, तर चंद्रकांत वारघडे यांना वृक्षमित्र पुरस्कार प्रदान करण्यात आला.
प्रा. प्रवीण जावळे यांनी स्वागत-प्रास्ताविक केले. विभाग प्रमुख डॉ. सारिका झांबड व प्रा. तस्लीम कुरेशी यांनी सूत्रसंचालन केले. डी. फार्मसी विभागप्रमुख स्नेहल जाधव यांनी सोहळ्याचे संयोजन केले.