पुणे, ता. १६ : आसाममधील गुवाहाटी येथील सेंटर फॉर कल्चरल रिसोर्सेस अँड ट्रेनिंग या संस्थेत देशातील उपक्रमशील आणि अभ्यासू शिक्षकांना शैक्षणिक क्षेत्रातील नावीन्यपूर्ण बदलांचे प्रशिक्षण दिले जाते. शिक्षणात संगीत, नाट्य, लोककला, हस्तकला आदींचा प्रभावी वापर करण्याबाबतचे प्रशिक्षण या संस्थेत दिले जाते. या राष्ट्रीय स्तरावरील प्रशिक्षणात महाराष्ट्रातील शैक्षणिक संशोधन आणि प्रशिक्षण परिषदेच्या वतीने प्रा. डॉ. स्मिता खोपडे, सयाजीराव पावरा, भावना चौधरी, कैलास वाघ, अनिता माने, संतोष धोंगडे, संजय खाडे, बाबासाहेब मांदाडे, सुनीता मासाळकर, तेजस्विनी मासाळकर आदी शिक्षक-प्राध्यापक सहभागी झाले होते. त्यांनी सांस्कृतिक कार्यक्रमात महाराष्ट्राचा सांस्कृतिक वारसा सादर केला. त्यामध्ये गणेश वंदना, पोवाडा, लावणी, अभंग, जात्यावरील ओव्या, गवळण, भारूड, नृत्य, कोळी नृत्य, आदिवासी नृत्य महाराष्ट्राच्या पारंपरिक वेशभूषेत सादर केले. छत्रपती शिवाजी महाराज आणि आसामचा शूर योद्धा लचित बोरफुकन यांच्या कार्याचा आणि शौर्याचा सुरेख संगम महाराष्ट्राच्या प्रशिक्षणार्थी शिक्षकांनी साधला. मराठी भाषा, मराठी संस्कृती, मराठी पोवाडा, लावणी, अभंग आणि नृत्य पाहून देशभरातून आलेले प्रशिक्षणार्थी आणि स्थानिक गुवाहाटीकर भारावून गेले. याप्रसंगी संस्थेचे संचालक निरंजन भुया, विभागीय संचालक शशांक पांडे, लेखापाल प्रणव गोस्वामी उपस्थित होते. त्यांनी महाराष्ट्राच्या सांस्कृतिक परंपरेचे कौतुक करून प्रशिक्षणार्थी शिक्षकांचे अभिनंदन केले. स्थानिक गुवाहाटीकरांनी कलेला उत्स्फूर्तपणे दाद दिली. सूत्रसंचालन प्रा. डॉ. खोपडे यांनी केले.