पुणे, ता. १४ ः चोरी करणाऱ्या आंतरराज्य टोळीला अलंकार पोलिसांनी अटक केली आहे. त्यांच्याकडून ३५ बंडल केबल, ट्रक, चोरीसाठी लागणारे साहित्य मिळून तब्बल २५ लाखांचा ऐवज जप्त केला आहे.
शफीक अहमद (वय ४९ , रा. पूर्व दिल्ली), राजबुल (वय ३० रा. पश्चिम दिल्ली), एम. डी . जीत (वय ४४, रा. बिहार) आणि वारीस फकीर महंमद (वय ३५ रा. त्रिलोकपुरी दिल्ली) अशी अटक केलेल्यांची नावे आहेत. अलंकार हद्दीतील कर्वे पुतळ्याजवळ पाच लाखांची केबल चोरीची घटना २१ ते २२ जुलैला घडली होती. तांबे असलेली धातूची एक हजार फूट लांब केबल बीएसएनएल टेलिफोन कनेक्टसाठी वापरली जाणार होती. केबलची चोरी झाल्याप्रकरणी अलंकार पोलिस ठाण्यात गुन्हा दाखल करण्यात आला होता. दोन ऑगस्टला अलंकार पोलिस हद्दीत पेट्रोलिंग करत असताना दाखल गुन्ह्यातील संशयित आरोपी हे मृत्युंजय मंदिराजवळ संशयितरीत्या फिरत असल्याची माहिती पथकाला मिळाली. त्यानंतर पथकाने वरिष्ठांना माहिती कळवून घटनास्थळी धाव घेतली.
पोलिसांना पाहताच संशयितांनी हालचाली सुरू करत पळून जाण्याचा प्रयत्न केला. पळून जात असताना पथकाने चोरट्यांना अत्यंत शिताफीने पकडून चौकशी केली. चौकशीत त्यांनी गुन्ह्याची कबुली दिली आहे. त्यांच्याकडून ३५ बंडल केबल, ट्रक, चोरीसाठी लागणारे साहित्य मिळून तब्बल २५ लाखांचा ऐवज जप्त केला. ही कामगिरी पोलिस उपायुक्त संभाजी कदम, एसीपी अजय परमार, वरिष्ठ पोलिस निरीक्षक सुनीता रोकडे, पोलिस निरीक्षक अनिल माने, उपनिरीक्षक गणेश दीक्षित, महेश निंबाळकर, धीरज पवार, सोमेश्वर यादव, तुषार सांळुखे, माधुरी कुंभार, शिवाजी शिंदे, अंकुश लोंढे, साईनाथ पाटील, राकेश क्षीरसागर यांनी केली.