पुणे, ता. १६ ः पूर्ववैमनस्यातून टोळक्याने एकावर तीक्ष्ण शस्त्राने वार करून, खुनाचा प्रयत्न केल्याची घटना लोहगाव भागात घडली. याप्रकरणी सहा जणांविरुद्ध गुन्हा दाखल करण्यात आला.
भाऊसाहेब गोपीनाथ राखपसरे (वय ४८, रा. मोझे आळी, लोहगाव) असे गंभीर जखमी झालेल्याचे नाव आहे. खुनाचा प्रयत्न केल्याप्रकरणी नितीन सकट, निकेश पाटील, गणेश सखाराम राखपसरे, ओंकार ऊर्फ खंड्या खांडे यांच्यासह सहा जणांविरुद्ध गुन्हा दाखल करण्यात आला आहे. भाऊसाहेब राखपसरे यांची आरोपींशी भांडणे झाली होती. राखपसरे यांनी दिलेल्या तक्रारीमुळे आरोपींवर पोलिसांनी झोपडपट्टी दादा प्रतिबंधक कायद्यान्वये (एमपीडीए) कारवाई केली होती. या कारणावरून नितीन, निकेश, गणेश, ओंकार आणि साथीदार चिडले होते. आरोपींनी १३ ऑगस्टला रात्री साडेअकराच्या सुमारास त्यांच्यावर लोहगाव भागात हल्ला केला. त्यांच्यावर तीक्ष्ण शस्त्राने वार करून आरोपी पसार झाले. सहायक पोलिस निरीक्षक सचिन धामणे तपास करत आहेत.