पुणे, ता. २२ : पालखी सोहळ्यात दर्शनासाठी आलेल्या महिलांच्या दागिन्यांची चोरी झाली. बोपोडी चौक व खडकी परिसरात ही घटना घडली. याप्रकरणी चोरट्यांविरुद्ध खडकी पोलिस ठाण्यात गुन्हा दाखल केला आहे. याबरोबरच दिंडीतील वारकऱ्यांचे मोबाईलही चोरट्यांनी चोरले आहेत.
याप्रकरणी ६८ वर्षीय महिलेने फिर्याद दिली. पोलिसांनी दिलेल्या माहितीनुसार, फिर्यादी महिला बोपोडी चौकात पालखीचे दर्शन घेण्यासाठी आल्या होत्या. यावेळी चोरट्यांनी महिलेच्या गळ्यातील मंगळसूत्र लंपास केले. पालखी सोहळ्यात आणखी एका महिलेचे दागिने लांबविल्याची घटना घडली.
दरम्यान, वारकऱ्यांचे मोबाईल लांबविण्याच्या घटनाही घडल्या आहेत. याप्रकरणी मार्केट यार्ड पोलिसांनी प्रकाश देवराम परिहार (वय २९, रा. लोहियानगर) व मोहम्मद मनान जमाल शेख (वय २५, रा. मार्केट यार्ड) यांना अटक केली आहे. मार्केट यार्ड येथील श्री शारदा गजानन मंदिराजवळ दिंडी आल्यानंतर वारकऱ्यांचे मोबाईल चोरीला गेले होते. यावेळी गस्तीवर असणाऱ्या पोलिस निरीक्षक मनीषा पाटील, गुन्हे शाखेच्या निरीक्षक सुनीता नवले यांच्या मार्गदर्शनाखाली तपास पथकाने चोरट्यांना अटक करून त्यांच्याकडून दोन मोबाईल जप्त केले.