पुणे, ता. २४ : श्री लकडीपूल विठ्ठल मंदिर ट्रस्टच्या वतीने पुणे ते पंढरपूर पालखी मार्गावर वारकरी बांधवांसाठी मोफत टँकर सेवा उपलब्ध करून देण्यात आली आहे. वारीदरम्यान हजारो वारकरी पायी प्रवास करतात. यावेळी त्यांना पाण्याची गरज प्रकर्षाने भासते, हे लक्षात घेऊन ट्रस्टतर्फे सामाजिक भान राखत विविध ठिकाणी टँकरद्वारे पाणी वाटप करण्यात येत आहे. या उपक्रमाचा लाभ हजारो वारकऱ्यांना होत असून, ही टँकर सेवा सतत कार्यरत आहे.
दीपक थोरात म्हणाले, श्री लकडीपूल विठ्ठल मंदिर ट्रस्ट, वामन दत्त मंदिर ट्रस्ट आणि वारकरी सेवा संघ यांच्या वतीने यंदा सलग तिसऱ्या वर्षी पुणे ते पंढरपूर वारीदरम्यान वैद्यकीय सेवा देण्यात येत आहे. या सेवेमध्ये दोन ॲम्बुलन्स, डॉक्टरांचे पथक, थेरपीस्टसह १० ते १२ सेवकांचा समावेश आहे. हे सर्व सेवक १५ दिवस अहोरात्र सेवा बजावत आहेत. वारकऱ्यांना पायांतील दुखण्यांवर फूट मसाज थेरपी देण्यात आली असून, आरोग्य शिबिरही घेण्यात आले. या शिबिराचा ८०० हून अधिक वारकऱ्यांनी लाभ घेतला. याशिवाय, स्टोक्स फाउंडेशनचे चेतन पानसरे यांच्या वतीने दिंडी क्रमांक ३३, दिंडी क्रमांक २०, टाकळकर दिंडी (जालना) आणि पुण्यातील सामाजिक संस्था राष्ट्रीय कला ॲकॅडमी यांना भेट म्हणून तंबू देण्यात आले.