पुणे, ता. २९ : वयोवृद्ध सेवानिवृत्त पीएमपीएमएल कर्मचाऱ्यांचा ग्रॅच्युइटी व वैद्यकीय योजनांवरील थकीत मागण्यांकडे प्रशासनाने तातडीने लक्ष द्यावे, अन्यथा सोमवार (ता. १) पासून स्वारगेट मुख्यालयासमोर रास्तारोको आंदोलन करण्याचा इशारा पीएमपीएमएल कामगार संघटनेने दिला आहे, अशी माहिती संघटनेचे अध्यक्ष पुरुषोत्तम लाखवडे यांनी पत्रकार परिषदेत दिली. यावेळी राजेंद्र ओतारी, मुरलीधर मोरे, अशोक बालवे, जाफरभाई जमादार, बाळासाहेब झोंबाडे आदी उपस्थित होते.
सेवानिवृत्त सेवकांच्या मुख्य मागण्यांमध्ये १ एप्रिल २०१७ ते नोव्हेंबर २०२३ दरम्यान निवृत्त झालेल्यांना सहाव्या वेतन आयोगानुसार अदा झालेल्या सात लाख रुपयांच्या ग्रॅच्युईटीतील अपूर्ण फरक, रजा रोखीकरणाचा फरक मिळावा, सातव्या वेतन आयोगानुसार एकरकमी देणे यांचा समावेश आहे. तसेच डिसेंबर २०२३ नंतर निवृत्त झालेल्यांच्या थकीत रकमा मिळाव्यात आदी मागण्या आहेत. त्यांची दखल न घेतल्यास आंदोलनातून उद्‍भवणाऱ्या स्थितीची जबाबदारी प्रशासनावर राहील, असे लाखवडे यांनी स्पष्ट केले.