पुणे, ता. १ : दुर्गा भागवत यांच्या ‘व्यासपर्व’ या पुस्तकाच्या हिंदी भाषेतील अनुवादाचे प्रकाशन नुकतेच झाले. दिल्ली येथील राजकमल प्रकाशनाने प्रसिद्ध केलेल्या या पुस्तकाचा अनुवाद वासंतिका पुणतांबेकर यांनी केला आहे. पुणतांबेकर यांच्या पुण्यातील निवासस्थानी एका अनौपचारिक कार्यक्रमात पुस्तकाचे प्रकाशन झाले.
याप्रसंगी ‘मिळून साऱ्याजणी’ मासिकाच्या संपादक गीताली वि. म., सोनाली ढापरे, विदिशा पुणतांबेकर, विशाखा ठाकूर आदी उपस्थित होते. गीताली वि. म. म्हणाल्या, ‘‘व्यासपर्व हे महाभारतातील व्यक्तिरेखा आणि आजच्या युगातील व्यक्ती यांचा सुरेख संगम आहे. महाभारतातील वेगवेगळ्या व्यक्तिरेखा आजही आपल्याला आपल्या अवतीभवती दिसत राहतात; कारण ती मानवाचीच भिन्न-भिन्न रूपे आहेत. वासंतिका पुणतांबेकरांनी हे पुस्तक हिंदीत आणल्यामुळे हिंदी भाषिकांनाही या पुस्तकाचा लाभ घेता येईल.’’ पुणतांबेकर या गेली ४५ वर्षे अनुवादाच्या क्षेत्रात कार्यरत असून त्यांनी ‘राधेय’, ‘ऋतुचक्र’ यांसारख्या पुस्तकांचा हिंदीत अनुवाद केला आहे.