पुणे, ता. २ : महाराष्ट्र लोकसेवा आयोगाच्या (एमपीएससी) ‘वनसेवा मुख्य परीक्षा-२०२४’ उत्तीर्ण झालेल्या अनुसूचित जातीच्या उमेदवारांना मुलाखतीच्या तयारीसाठी डॉ. बाबासाहेब आंबेडकर संशोधन व प्रशिक्षण संस्था (बार्टी)तर्फे आर्थिक साहाय्य योजना जाहीर करण्यात आली आहे. या योजनेसाठी पात्र असलेल्या उमेदवारांना १० हजारांचे एकरकमी आर्थिक साहाय्य देण्यात येणार आहे.
आयोगाच्या ‘वनसेवा मुख्य परीक्षा-२०२४’ चा निकाल नुकताच जाहीर झाला आहे. या निकालाच्या आधारावर मुलाखतीसाठी पात्र ठरलेल्या राज्यातील अनुसूचित जातीच्या उमेदवारांना हे अर्थसाहाय्य मिळणार आहे. मुलाखतीची तयारी अधिक प्रभावीपणे करता यावी आणि उमेदवारांवरील आर्थिक ताण कमी व्हावा, हा या योजनेमागचा मुख्य उद्देश आहे. या संदर्भातील सविस्तर जाहिरात आणि ऑनलाइन अर्ज भरण्याची प्रक्रिया ‘बार्टी’ संस्थेच्या अधिकृत संकेतस्थळावर प्रसिद्ध केली आहे.
‘‘राज्यातील जास्तीत जास्त पात्र उमेदवारांनी या योजनेचा लाभ घ्यावा,’’ असे आवाहन ‘बार्टी’चे महासंचालक सुनील वारे यांनी केले आहे. अधिक माहितीसाठी उमेदवारांनी ‘बार्टी’च्या संकेतस्थळावर http://barti.maharashtra.gov.in भेट द्यावी, तसेच NOTICEBOARD > Maharashtra Public Service Commission Forest Service Main Examination-2024 या लिंकवर तपशील तपासावा.