पुणे, ता. ९ ः ‘पीएमपी’ प्रशासनातर्फे रविवारपर्यंत (ता. १४) संत गाडगेबाबा स्वच्छता अभियान राबविण्यात येणार आहे. ‘पीएमपी’च्या अध्यक्षांसह सुमारे १० हजार कर्मचारी या अभियानात सहभागी होत आहेत.
प्रवाशांना अनेकदा बसमधील व आगारातील अस्वच्छतेचा अनुभव येतो. याची ते तक्रारदेखील करतात, मात्र प्रशासनाकडून त्याची फारशी गंभीर दखल घेतली जात नाही. आता मात्र स्वतःच ‘पीएमपी’चे अध्यक्ष पंकज देवरे हे स्वच्छतेसाठी आग्रही आहेत. त्यामुळे प्रशासनातील कर्मचारी व अधिकाऱ्यांनी हातात झाडू घेऊन स्वच्छता करण्यास सुरुवात केली आहे. सोमवारी स्वारगेट आगार, अण्णा भाऊ साठे (अप्पर आगार), स्वारगेट कार्यालय, पिंपरी आगार, कोथरूड, भेकराईनगर येथील आगार आदी ठिकाणी स्वच्छता करण्यात आली.
‘‘प्रवाशांना प्रवास करताना चांगला अनुभव यावा, बस व आगारातील परिस्थिती सुधारावी, स्वच्छता व्हावी या हेतूने संत गाडगेबाबा अभियान राबविण्यात येत आहे. सर्व कर्मचारी, अधिकारी यांचा यात सहभाग असणार आहे,’’ असे पंकज देवरे यांनी सांगितले.