पुणे, ता. ९ : शाळेत सोडण्याच्या बहाण्याने एका तरुणाने चौदावर्षीय मुलीवर लैंगिक अत्याचार केल्याची धक्कादायक घटना समोर आली आहे. याप्रकरणी विश्रांतवाडी पोलिसांनी एका तरुणाला अटक केली.
मुनाकिब नासीर अन्सारी (वय १८, रा. विमाननगर) असे संशयित आरोपीचे नाव आहे. पोलिसांनी दिलेल्या माहितीनुसार, आरोपी तरुणाने दोन महिन्यांपूर्वी शाळेत बसने जाणाऱ्या अल्पवयीन मुलीशी ओळख करून मैत्री केली. त्याने चार डिसेंबर रोजी दुपारी मुलीला शाळेत सोडतो, असे सांगून त्याच्या दुचाकीवर बसवले. परंतु, शाळेत न सोडता एका ठिकाणी नेऊन त्याने मुलीवर लैंगिक अत्याचार केला. तसेच, ही बाब कोणालाही न सांगण्याची धमकी दिली. हा घडलेला प्रकार मुलीने तिच्या पालकांना सात डिसेंबर रोजी रात्री सांगितला. त्यानंतर पालकांनी दुसऱ्या दिवशी पहाटे विश्रांतवाडी पोलिस ठाण्यात तक्रार नोंदवली. त्यानुसार बालकांचे लैंगिक अत्याचारापासून संरक्षण (पोक्सो) अधिनियमानुसार गुन्हा दाखल करण्यात आला.
पोलिस आयुक्त अमितेश कुमार, पोलिस सहआयुक्त रंजनकुमार शर्मा, अतिरिक्त आयुक्त मनोज पाटील, पोलिस उपायुक्त सोमय मुंडे आणि वरिष्ठ निरीक्षक मंगेश हांडे यांच्या मार्गदर्शनाखाली तपास पथकातील पोलिस उपनिरीक्षक विशाल माने, महेश भोसले, पोलिस हवालदार बबन वणवे, पोलिस अंमलदार धवल लोणकर, विशाल गाडे, स्वप्नील कांबळे, प्रमोद जाधव यांनी आरोपीला केवळ दोन तासांत अटक केली.