पुणे, ता. ९ : ‘‘मातृभूमीची सेवा बजावताना वीरमरण आलेल्या, जखमी झालेल्या सैनिकांच्या कुटुंबीयांच्या प्रश्नासाठी जिल्हा प्रशासनाने एक खडकी योजना सुरू करावी,’’ अशा सूचना विभागीय आयुक्त डॉ. चंद्रकांत पुलकुंडवार यांनी केली.
जिल्हा सैनिक कल्याण कार्यालयामार्फत आयोजित ‘सशस्त्र सेना ध्वजदिन २०२५’ निधी संकलनाचा प्रारंभ पुलकुंडवार यांच्या हस्ते झाला. या वेळी त्यांनी या सूचना केल्या. याप्रसंगी पुणे महापालिका आयुक्त नवलकिशोर राम, जिल्हाधिकारी जितेंद्र डुडी, अपर जिल्हाधिकारी सतीश राऊत, निवासी उपजिल्हाधिकारी ज्योती कदम, पिंपरी-चिंचवड महापालिकेच्या अतिरिक्त आयुक्त तृप्ती सांडभोर, जिल्हा उद्योग केंद्राच्या महाव्यवस्थापक अर्चना कोठारी, जिल्हा सैनिक कल्याण अधिकारी ले. कर्नल सतेज हंगे (निवृत्त) उपस्थित होते.
डॉ. पुलकुंडवार म्हणाले, ‘‘जिल्हा प्रशासनाने ध्वजदिन निधी संकलनात कर्तव्य समजून आपले योगदान देवून सैनिक व कुटुंबीयांच्या पाठीशी खंबीरपणे उभे राहावे. माजी सैनिकांना काही अडचणी आल्यास किंवा कामे होत नसल्यास त्यांनी हे निदर्शनास आणून दिल्यास तातडीने त्यांचे निराकरण करू.’’