पुणे, ता. १५ ः राष्ट्रवादी कॉंग्रेस पक्ष व राष्ट्रवादी कॉंग्रेस शरदचंद्र पवार पक्ष एकत्रित येण्याच्या चर्चेला सोमवारी पूर्णविराम मिळाला. शिवसेना उद्धव बाळासाहेब ठाकरे पक्ष, राष्ट्रवादी कॉंग्रेस शरदचंद्र पवार पक्ष व कॉंग्रेस, या तिन्ही पक्षांनी सोमवारी महाविकास आघाडी म्हणूनच भाजप विरोधात महापालिका निवडणुकीला सामोरे जाण्याचा निर्णय जाहीर केला. महापालिका निवडणुकीसाठी समविचारी पक्षांना बरोबर घेतानाच महाराष्ट्र नवनिर्माण सेनेला सोबत घेण्याबाबतही चर्चा केली जाणार आहे.
महाविकास आघाडीतील प्रमुख घटक पक्ष असलेल्या शिवसेना उद्धव बाळासाहेब ठाकरे पक्ष, राष्ट्रवादी कॉंग्रेस शरदचंद्र पवार पक्ष व कॉंग्रेस या तिन्ही पक्षांची कॉंग्रेस भवन येथे सोमवारी पहिली बैठक झाली. यात महापालिका निवडणुकीबाबत एकत्र लढण्यावर चर्चा झाली. यावेळी कॉंग्रेसचे शहराध्यक्ष अरविंद शिंदे, राष्ट्रवादी कॉंग्रेस शरदचंद्र पवार पक्षाचे शहराध्यक्ष प्रशांत जगताप, शिवसेना उद्धव बाळासाहेब ठाकरे पक्षाचे शहर प्रमुख संजय मोरे व गजानन थरकुडे उपस्थित होते.
शिंदे म्हणाले, ‘‘महापालिका निवडणुकीत महाविकास आघाडीचे अधिकाधिक नगरसेवक कसे निवडून आणता येतील, यावर चर्चा झाली. मागील आठ वर्षांत पुण्याचा विकास थांबला आहे. भाजपला सत्तेपासून दूर ठेवण्यासाठी महाविकास आघाडी कटिबद्ध आहे. स्थानिक पातळीवर परिस्थितीनुसार कोणाला सोबत घ्यायचे, याचा निर्णय घ्यावा, असे प्रदेश कॉंग्रेसने सांगितले आहे. भाजपविरोधात लढण्यासाठी तयार असलेल्या सर्व पक्षांची एकजूट करण्यावर आमचे एकमत आहे.’’
जगताप म्हणाले, ‘‘महापालिका निवडणुकीसाठी उमेदवारीचे सूत्र कसे असेल, तिन्ही पक्षांच्या मागण्या काय आहेत, मागील निवडणुकीत दुसऱ्या क्रमांकावर कोण उमेदवार होता, तसेच तिन्ही पक्षांचा संयुक्त जाहीरनामा कसा असेल, यावर या बैठकीत चर्चा झाली. वाहतूक कोंडी, भ्रष्टाचार, गुन्हेगारी यांसारखे शहरातील प्रश्‍न गंभीर झाले आहेत. पुण्याचे हित, संरक्षण व विकासासाठी महाविकास आघाडी एकत्र लढणार आहे.’’

महाविकास आघाडी म्हणूनच महापालिका निवडणुकीला आम्ही सामोरे जाणार आहोत. महापालिका निवडणुकीची रणनीती आखली जाईल. भाजपचा रथ लोकहिताचा नसून तो कसा रोखायचा, यावर चर्चा होईल. जागावाटपाचे गणित एकत्र येऊन सोडविले जाईल. भाजप वगळता इतर सर्व पक्षांची मोट आम्ही बांधणार आहोत, असे संजय मोरे व गजानन थरकुडे यांनी सांगितले.
---------------------------