पुणे, ता. १६ ः जमिनीच्या खरेदी-विक्री व्यवहारात फसवणूक केल्याप्रकरणी दाखल असलेल्या गुन्ह्यात धनंजय कृष्णा वाडकर आणि त्याच्या जावयाच्या घराची नुकतीच झडती घेण्यात आली. या कारवाईत गुन्ह्याशी संबंधित डिजिटल व कागदोपत्री पुरावे जप्त करण्यात आले आहेत.
लॅव्हिश लक्झरी ‘एलएलपी’च्या निधीतून खरेदी केलेल्या मुळशी तालुक्यातील कासारसाई येथील सुमारे १६ एकर जमिनीची परस्पर संमतीशिवाय प्लॉटिंग करून विक्री करत तब्बल ५७ कोटी १४ लाख रुपयांचा अपहार केल्याप्रकरणी ‘एलएलपी’चा भागीदार धनंजय कृष्णा वाडकर (वय ५८, रा. कात्रज, पुणे) व अन्य आरोपींवर मुंबई पोलिसांच्या आर्थिक गुन्हे शाखेने गुन्हा दाखल केला आहे. आरोपींनी ‘एलएलपी’ची फसवणूक केल्याबरोबरच शासनाचीही मुद्रांक शुल्क चोरी करून आर्थिक फसवणूक केल्याचा आरोप आहे.
आर्थिक गुन्हे शाखेने दिलेल्या माहितीनुसार, २०२१ मध्ये आरोपी धनंजय वाडकर याने लॅव्हिश लक्झरी ‘एलएलपी’तील अन्य भागीदाराला कासारसाई (ता. मुळशी, जि. पुणे) येथे कृषी जमीन खरेदी करण्यासाठी प्रवृत्त केले. जमीन खरेदी केल्यानंतर ती अकृषिक (एनए) करून पुन्हा ‘एलएलपी’कडे हस्तांतरित केल्यास मोठा नफा मिळेल, असे आमिष दाखवून वाडकर याने ‘एलएलपी’कडून दोन कोटी ९८ लाख रुपये स्वतःच्या बँक खात्यात वर्ग करून घेतले. त्या रकमेतून त्याने सुमारे १६ एकर जमीन खरेदी केली. त्यानंतर ‘एलएलपी’ची परवानगी अथवा अन्य भागीदारांची संमती न घेता आरोपीने त्यापैकी सुमारे सहा एकर जमीन प्लॉटिंगद्वारे विक्री केली. विक्रीतून मिळालेली रक्कम ‘एलएलपी’कडे परत न करता तसेच उर्वरित जमीनही ‘एलएलपी’कडे हस्तांतरित न करता आरोपीने स्वतःच्या ताब्यात ठेवली. या विक्रीतून मिळालेली सुमारे २९ कोटी रुपये आणि सध्या आरोपीच्या ताब्यात असलेल्या जमिनीची शासकीय किंमत सुमारे २८ कोटी १४ लाख रुपये अशी एकूण ५७ कोटी १४ लाख रुपयांची फसवणूक व अपहार झाल्याचे तपासात उघड झाले आहे, अशी माहिती शाखेचे तपास अधिकारी गणेश पवार यांनी दिली.

मुख्य आरोपी वाडकर पसार
फसवणूक प्रकरणातील जमीन बाजारभावाने विकताना कमी रकमेचे दस्त नोंदवून मुद्रांक शुल्क चुकविण्यात आल्याचा संशय असून, त्यामुळे शासनाचीही आर्थिक फसवणूक झाल्याचा आरोप आर्थिक गुन्हे शाखेने केला आहे. त्यानंतर न्यायालयाच्या परवानगीने आर्थिक गुन्हे शाखेच्या तपास पथकाने आरोपी वाडकर यांच्या कात्रज येथील घरी तसेच त्याचा जावई शुभम खंडू ढवळे (रा. बालेवाडी, पुणे) यांच्या घराची झडती घेतली. या झडतीत गुन्ह्याशी संबंधित डिजिटल व कागदोपत्री पुरावे जप्त करण्यात आले आहेत. दरम्यान, गुन्हा दाखल झाल्यानंतर मुख्य आरोपी वाडकर पसार झाला असून, त्याचा शोध सुरू आहे. या प्रकरणाचा पुढील तपास आर्थिक गुन्हे शाखेकडून सुरू आहे.