पुणे, ता. १६ : पुण्यातील नौरोसजी वाडिया महाविद्यालयाच्या शिरपेचात मानाचा तुरा रोवला गेला आहे. महाराष्ट्र लोकसेवा आयोगातर्फे (एमपीएससी) घेण्यात आलेल्या परीक्षेत महाविद्यालयाच्या भूगर्भशास्त्र आणि पेट्रोलियम टेक्नॉलॉजी विभागातील नऊ जणांची ‘राजपत्रित’ अधिकारी म्हणून निवड झाली आहे. यामध्ये पाच सहाय्यक प्राध्यापक आणि चार माजी विद्यार्थ्यांचा समावेश आहे.
राज्य सरकारच्या पाणीपुरवठा विभागांतर्गत येणाऱ्या ‘भूजल सर्वेक्षण आणि विकास यंत्रणे’साठी ही निवड प्रक्रिया राबविण्यात आली होती. १० डिसेंबर रोजी या परीक्षेचा निकाल जाहीर झाला. यामध्ये वरिष्ठ, सहाय्यक आणि कनिष्ठ भूवैज्ञानिक अशा विविध पदांवर या उमेदवारांची वर्णी लागली आहे. या यशाबद्दल महाविद्यालयात त्यांच्या सत्कार सोहळ्याचे आयोजन करण्यात आले होते. मॉडर्न एज्युकेशन सोसायटीचे विश्‍वस्त प्रा. सचिन सानप यांच्या हस्ते सर्व यशस्वी उमेदवारांचा सत्कार करण्यात आला. यावेळी प्राचार्य डॉ. बी. बी. बहुले, उपप्राचार्य डॉ. सुभाष अहिरे, विभागप्रमुख डॉ. संजिदा खान, डॉ. किरण कुंभार आदी उपस्थित होते.
राजपत्रित अधिकारी म्हणून निवड झालेल्यांमध्ये सध्या महाविद्यालयात कार्यरत असलेले सहाय्यक प्राध्यापक प्रा. रजत सोवळे, प्रा. विश्‍वजित पाऊलबुद्धे, प्रा. विनायक गुणे, प्रा. अपूर्वा चोरडिया आणि प्रा. डॉ. गोविंद जोशी यांचा समावेश आहे. तसेच माजी विद्यार्थ्यांमध्ये प्रा. सोमनाथ शिंदे, प्रा. सोहन साळुंखे, शुभम वाघमारे आणि शुभम पवळ यांनी यश संपादन केले आहे. प्रा. सानप म्हणाले, ‘‘वाडिया महाविद्यालयाची शंभर वर्षांची यशस्वी परंपरा आजचे विद्यार्थी आणि प्राध्यापक तितक्याच जोमाने पुढे नेत आहेत, याचा आम्हाला सार्थ अभिमान आहे.’’