पुणे, ता. १६ : ‘‘संघर्षातून घडलेल्या माणसाला परिस्थितीची जाणीव असते. त्यातून त्याच्या ज्ञानाची समज अधिक व्यापक झालेली असते. त्यामुळे संघर्षातून घडलेला माणूस आयुष्यात नेहमी यशाच्या मार्गावर चालत राहतो’’, असे मत ज्येष्ठ साहित्यिक-विचारवंत डॉ. श्रीपाल सबनीस यांनी व्यक्त केले.
​जीवन करपे लिखित आणि मायमिरर पब्लिशिंग हाऊस प्रकाशित ‘​संघर्ष माझा सोबती- पुणे ते जर्मनी’ या पुस्तकाचे प्रकाशन डॉ. सबनीस यांच्या हस्ते झाले; त्यावेळी ते बोलत होते. याप्रसंगी माजी गृहराज्यमंत्री रमेश बागवे, निवृत्त विशेष पोलिस महानिरीक्षक चंद्रशेखर दैठणकर, उद्योजक विजय ढेरे, ज्येष्ठ वकील श्रीकांत अगस्ते, जीवन करपे आदी उपस्थित होते.
डॉ. सबनीस म्हणाले, ‘‘मनाची शुद्धता, प्रामाणिकपणा, संस्काराचे महत्त्व, एकमेकांचा आदर, प्रेमभावातून घडलेले जीवन करपे त्यांच्या आयुष्यात हीच मूल्ये जगत आहेत. उद्योग-व्यवसायामुळे जर्मनीत स्थायिक झाले असले, तरी भारताविषयी, कुटुंबाविषयी त्यांच्या मनात असलेली आस्था, अभिमान आणि कुटुंबाला जोडून ठेवण्याचे कसब प्रभावीपणे दिसून येते. भारतातले उत्तम परदेशात न्यावे आणि तिकडचे चांगले इकडे आणावे, या विचारांवर त्यांचे काम सुरु आहे.’’ सूत्रसंचालन गौरव बोराडे यांनी केले. भाऊ करपे यांनी आभार मानले.