पुणे, ता. १६ : ‘‘राज्‍य सरकारने एकाच वर्षात पुण्‍याला १२ नवीन पोलिस ठाण्यांसह दोन पोलिस उपायुक्त व दोन हजार कर्मचारी, अंमलदारांचे मनुष्यबळ उपलब्ध करून दिले आहे. त्यामुळे आता संबंधित पोलिस ठाण्यांवरील ताण कमी होण्यास मदत होणार आहे’’, असा विश्‍वास पोलिस आयुक्त अमितेश कुमार यांनी व्यक्त केला. तसेच पोलिस परिक्षेत्र क्रीडा स्पर्धा उत्कृष्टपणे पार पाडण्यासाठी सर्वांनी मेहनत घेतल्‍याबद्दल त्‍यांनी पोलिसांचे कौतुकही केले.
पुणे शहर व पिंपरी-चिंचवड पोलिस आयुक्तालय परिक्षेत्र ४१ वी क्रीडा स्पर्धा पार पडली. या स्‍पर्धांचा समारोप मंगळवारी शिवाजीनगर पोलिस मुख्यालयात आयोजित केला होता, त्‍याप्रसंगी ते बोलत होते. या कार्यक्रमाला सहपोलिस आयुक्त रंजनकुमार शर्मा, अपर पोलिस आयुक्त संजय पाटील, पंकज देशमुख, बसवराज तेली, कृषीकेश रावले, निखिल पिंगळे, मिलिंद मोहिते, संभाजी कदम, राजलक्ष्मी शिवणकर, सहाय्यक आयुक्‍त अनुराधा उदमले, नंदा वग्याणी उपस्थित होते.
अमितेश कुमार म्‍हणाले, ‘‘शहर पोलिस दलाची कार्यशक्ती वाढवण्यासाठी शासनाने नवीन पोलिस ठाण्यांसह परिमंडळाला मंजुरी दिली आहे. त्यासोबतच अतिरिक्त मनुष्यबळही उपलब्ध केले आहे, त्यामुळे आणखी जबाबदारी वाढली आहे.’’