पुणे, ता. १७ : पीएमपी प्रशासनाने २५ डबलडेकर बसची निविदा काढली आहे. भाडेतत्वावरील या बस पूर्णतः इलेक्ट्रिक व वातानुकूलित असतील. काही दिवसांपूर्वी पुण्यातील विविध भागांत या बसची चाचणी झाली होती. ती यशस्वी झाल्यानंतर निविदा प्रक्रिया राबविण्यात आली. एप्रिल-मे महिन्यात म्हणजेच येत्या उन्हाळ्यात पुणेकरांना डबलडेकरचा प्रवास घडण्याची शक्यता आहे.

गेल्या ३० वर्षांपासून पुणेकरांच्या आठवणीमध्ये असलेली डबलडेकर बस आता नव्या रूपात व नव्या ढंगात पुन्हा एकदा रस्त्यांवर धावणार आहे. स्वीच कंपनीच्या या बसची काही दिवसांपूर्वी पुण्यातील विविध भागांत चाचणी झाली. त्यानंतर पीएमपी प्रशासनाने निविदा प्रसिद्ध केली आहे. पहिल्या टप्प्यात २५ बस पीएमपीच्या ताफ्यात दाखल होत आहे. चेन्नई येथे स्वीच कंपनीच्या बसचे उत्पादन होते. तेथून या बस पुण्यात दाखल होणार आहेत. यापूर्वी १९९५ मध्ये पुण्यात डबलडेकर बस धावल्या होत्या.

कशी असेल डबलडेकर बस :
१. इलेक्ट्रिक व वातानुकूलित
२. उत्तम सस्पेन्शनमुळे प्रवास आरामदायक
३. डिजिटल तिकिटिंगची सुविधा
४. लंडनमध्ये धावणाऱ्या बससारखी बस

बसची वैशिष्ट्ये...
बसलेले : ७०
उभे राहून : ४०
- प्रवासी क्षमता

१०० हून अधिक
- किती जणांचा प्रवास

२ कोटी रुपये
- बसची किंमत

१४ फूट ४ इंच
- बसची उंची

काय फायदा होणार?
- मेट्रोच्या स्थानकाचा अडसर होणार नाही
- पीएमपीला जास्त बसची अथवा फेऱ्यांची गरज भासणार नाही
- पूर्वी ‘एसएलएफ’ प्रकारची डबलडेकर बस होती. त्यांचा देखभाल-दुरुस्ती खर्च जास्त होता
- नवीन इलेक्ट्रिक बसमुळे देखभालीचा खर्च खूप कमी असणार

पीएमपीचा प्रवास
१६५०
- एकूण बस संख्या

१२ लाख (सरासरी)
- दररोजचे प्रवासी

१ कोटी ५० लाख (सुमारे)
- प्रवासी उत्पन्न

३ लाख ६० हजार कि.मी.
- दररोजचा प्रवास

३८१ मार्गांवर बस धावते
- एकूण मार्ग

डबलडेकर बससाठी निविदा प्रसिद्ध झाली आहे. प्रक्रिया पूर्ण होऊन बस प्रत्यक्षात धावण्यासाठी चार महिन्यांचा कालावधी लागण्याची शक्यता आहे. पहिल्या टप्प्यात २५ बस पीएमपीच्या ताफ्यात
दाखल होतील.
- पंकज देवरे,
अध्यक्ष व व्यवस्थापकीय संचालक, पीएमपीएमएल, पुणे