पुणे, ता. १७ ः गाडी पार्किंगच्या वादातून टोळक्याने कुटुंबीयाला बेदम मारहाण करत एकावर वार केल्याची घटना रविवारी (ता. १४) संध्याकाळी साडेसहाच्या सुमारास कात्रजमधील संतोषनगरमध्ये घडली आहे. याप्रकरणी आंबेगाव पोलिसांनी टोळक्याला अटक केली आहे.
मधुकर साधूजी भगत (वय ५२, रा. कात्रज) आणि वैभव मधुकर भगत (वय २४) अशी अटक केलेल्यांची नावे आहेत. एका अल्पवयीनाला ताब्यात घेतले आहे. ४७ वर्षीय जखमी झालेल्या नागरिकाने आंबेगाव पोलिस ठाण्यात फिर्याद दाखल केली आहे. पोलिसांनी दिलेल्या माहितीनुसार, तक्रारदार हे कात्रजमध्ये राहायला असून, १४ डिसेंबरला संध्याकाळी साडेसहाच्या सुमारास कात्रजमधील संतोषनगरमधील गल्ली क्रमांक आठमध्ये गाडी पार्किंग करत होते. त्यावेळी त्यांची आरोपींसोबत बाचाबाची झाली. त्याच रागातून आरोपींनी तक्रारदारावर लोखंडी हत्याराने वार करून गंभीर जखमी केले. भांडणात मध्यस्थी करणाऱ्या तक्रारदाराच्या मुलासह पत्नीलाही धक्काबुक्की करत दमदाटी केली. याप्रकरणी सहाय्यक पोलिस निरीक्षक फिरोज मुलानी तपास करत आहेत.

मेडिकल दुकानात चोरी
शहरातील मध्यवर्ती शिवाजीनगर परिसरातील बालगंधर्व चौकात असलेल्या मेडिकलचे शटर उचकटून चोरट्यांनी ३२ हजारांची रोकड, मोबाईल असा ४२ हजारांचा ऐवज चोरून नेला आहे. ही घटना मंगळवारी (ता. १६) पहाटे पावणेतीनच्या सुमारास घडली आहे. याप्रकरणी दोन अनोळखी चोरट्यांवर गुन्हा दाखल करण्यात आला आहे. तक्रारदाराने शिवाजीनगर पोलिस ठाण्यात फिर्याद दाखल केली आहे. याप्रकरणी सहाय्यक पोलिस निरीक्षक संजय पांढरे तपास करत आहेत.

पाषाणमध्ये घरातून तीन लॅपटॉप चोरीला
बंद घराचे कुलूप तोडून चोरट्यांनी ६२ हजार रुपयांचे तीन लॅपटॉप चोरून नेले आहेत. ही घटना १३ ते १५ डिसेंबर या कालावधीत पाषाण-सूस रस्त्यावरील वरदायिनी सोसायटीत घडली आहे. याप्रकरणी तरुणाने बाणेर पोलिस ठाण्यात फिर्याद दाखल केली आहे. त्यानुसार अज्ञात चोरट्यांवर गुन्हा दाखल करण्यात आला आहे.