प्रसाद कानडे : सकाळ वृत्तसेवा
पुणे, ता. १७ ः वाहन परवान्यासाठी स्लॉटची कमी झालेली संख्या व वेळेत बदल केल्याचा फटका मोटार ड्रायव्हिंग स्कूलसह वाहनधारकांना बसत आहे. राज्याच्या परिवहन विभागाने पुणे आरटीओ कार्यालयासाठी वाहन परवान्यासाठी निश्चित केलेला स्लॉटचा कोटा हा आठशेहून २५४ वर आणला. दुसरीकडे स्लॉटची वेळ ही रात्री एक ते दुपारी चार अशी करून सगळ्यांचीच गोची केली आहे. सकाळच्या वेळेत स्लॉट उपलब्ध होत नसल्याने ड्रायव्हिंग स्कूलचे चालक हे वाहनधारकांना रात्री जागे राहण्याच्या सूचना देतात. बिचारे वाहनधारक वाहन परवाना हवा असल्याने रात्री जागतात अन् स्लॉट घेण्यासाठी आवश्यक तो सोपस्कार पार पाडतात.
परिवहन आयुक्त विवेक भिमनवार यांनी गेल्या आठवड्यापासून वाहन परवाना संदर्भात नियमावली प्रसिद्ध केली आहे. यात पुणे आरटीओ कार्यालयाला वाहन परवान्यासाठी निर्धारित केलेला स्लॉटचा कोटा हा कमी करण्यात आला आहे. पूर्वी हा कोटा आठशे होता. याचा अर्थ दिवसभरात आठशे वाहन परवाना देण्याची मर्यादा होती. ती आता कमी करून २५४ इतकी केली आहे. परिणामी, वाहन परवान्यासाठी वेटिंग वाढत आहे. जानेवारीअखेरपर्यंत वाहनधारकांना आता स्लॉट उपलब्ध होत नाही. शिवाय ऑनलाइन स्लॉट बुक करताना काही प्रमाणात अडचणीदेखील येत असल्याचे ड्रायव्हिंग स्कूल चालकांचे म्हणणे आहे. या सर्वांचा फटका वाहनधारकांना बसत आहे.
-----------------
रात्रीस ‘बुकिंग’ चाले :
वाहन परवान्यासाठी ऑनलाइन स्लॉट बुकिंग करण्याची वेळ ही रात्री १ ते दुपारी ४ अशी आहे. मात्र, गेल्या आठवड्यापासून संगणक प्रणालीतील दोषामुळे अनेक चालकांना दिवसभरात स्लॉटचे बुकिंग होत नाही. ते वाहनधारकांना रात्रीचा पर्याय देतात. रात्री एक वाजल्यापासून स्लॉट बुक करण्याची प्रक्रिया सुरू होते. कधी काही मिनिटे लागतात, तर कधी अर्धा तास यासाठी वाट पाहावी लागते. स्लॉट बुक करताना वाहनधारकाच्या मोबाइलवर ओटीपी येतो. तो ओटीपी देण्यासाठी व अन्य काही सोपस्कार पार पाडण्यासाठी संबंधित वाहनधारकाला जागे राहावे लागत आहे.
--------------
‘स्लॉट’ कमी, वेटिंग जास्त :
पुण्यात दरवर्षी सुमारे ३ लाखांहून अधिक नवीन वाहने रस्त्यावर येतात, तर वर्षाला सुमारे पावणेदोन लाख नवीन वाहन परवाने वितरित होतात. ही संख्या मोठी आहे. असे असताना वाहन परवान्याच्या संख्येवर मर्यादा आणली आहे. दिवसाला ८०० वाहन परवान्याऐवजी आता २५४ ची मर्यादा घालण्यात आल्याने वाहनधारकांना वाहन परवान्यासाठी किमान महिनाभर तरी वाट पाहावी लागणार आहे.
------------
‘‘वाहन परवान्यासाठी नवीन कार्यप्रणाली लागू केली आहे. यात स्लॉटच्या संख्येवर मर्यादा आणली आहे. मात्र, पुण्यातील परिस्थिती लक्षात घेता, शनिवारी व रविवारीदेखील वाहन परवाना विभाग सुरू ठेवण्याचा विचार आहे. याबाबत लवकरच निर्णय घेऊ.
विवेक भिमनवार, परिवहन आयुक्त, मुंबई
-------------
‘‘परिवहन विभागाच्या संगणक विभागातील अधिकाऱ्यांच्या दुर्लक्षामुळे ही परिस्थिती निर्माण झाली आहे. स्लॉटची वेळ पूर्वीप्रमाणे म्हणजे सकाळी १० ते रात्री ८ अशी पूर्ववत करण्यात यावी. तसेच परिवहन आयुक्तांनी स्लॉटवर घातलेली मर्यादा काढून टाकावी. पूर्वीप्रमाणे ८०० स्लॉट मिळाले पाहिजेत.
-राजू घाटोळे, अध्यक्ष, महाराष्ट्र राज्य मोटार ड्रायव्हिंग स्कूल असोसिएशन
--------