पुणे, ता. १७ : पुणे पुस्तक महोत्सवातील ‘सकाळ प्रकाशन’च्या दालनात तीन लेखिकांचे आगमन झाले आणि लेखिका आणि वाचकांच्या संवादाने संपूर्ण दालन फुलून गेले. ‘लेखक आपल्या भेटीला’ या उपक्रमांतर्गत कांचन शेंडे, कल्याणी सरदेसाई आणि लीना दामले यांनी वाचकांशी संवाद साधला.
दरम्यान, महोत्सवात या दालनात लेखक भेटी देणार आहेत. यावेळी वाचकांना लेखकांशी संवाद साधण्याची संधी मिळणार आहे. ‘दृष्टी’, ‘निळा किनारा’ पुस्तकांच्या लेखिका कांचन शेंडे म्हणाल्या, ‘‘सर परशुरामभाऊ महाविद्यालयातून उपप्राचार्य पदावरून सेवानिवृत्त झाल्यावर मी विविध छंद जोपासायला सुरुवात केली. यात प्रामुख्याने महाविद्यालयीन कारकिर्दीत आलेले अनुभव आणि काही कौटुंबिक अनुभव शब्दबद्ध करण्याचे ठरवले. त्यातून ललित लेखस्वरूप ‘दृष्टी’ आणि प्रवास वर्णन ‘निळा किनारा’ पुस्तकांचे लेखन केले. या दोन्ही पुस्तकांना उत्तम प्रकारे वाचकांपर्यंत पोहोचविण्याचे काम ‘सकाळ प्रकाशना’तर्फे करण्यात आले.’’
‘हर स्टोरीज’ पुस्तकाच्या लेखिका कल्याणी सरदेसाई म्हणाल्या, ‘‘रामायणातील स्त्रियांचे भावविश्व स्वतंत्ररीत्या मांडले गेलेले नाही. रामायणातील सीता, मंथरा, शूर्पणखा, मंदोदरी, कैकयी, तारा, अहिल्या यांबरोबर अनेकांना माहिती नसलेल्या रामाची बहीण शांता, रावणाची आई कैकसी या स्त्रिया ‘हर स्टोरीज’ पुस्तकाद्वारे वाचकांसमोर आणल्या आहेत. रामायणकालीन स्त्रियांकडून आजच्या स्त्रियांना काही प्रेरणा मिळेल किंवा किमान त्यांची व्यथा आजच्या स्त्रियांना समजेल, हे या पुस्तकाद्वारे मांडले आहे.’’
लेखिका लीना दामले म्हणाल्या, ‘‘सकाळ प्रकाशनातर्फे ‘प्राचीन भारतीय खगोलविज्ञान’ हे पुस्तक प्रकाशित करण्यात आले. प्रसिद्ध अभ्यासक, संशोधक नीलेश ओक यांचा पॉडकास्ट ऐकत होते आणि त्यांची भाषांतरे माझ्या ग्रुपमध्ये शेअर करत होते. त्यांच्या खगोलीय अभ्यासपूर्ण संशोधनातून एका पुस्तकाची निर्मिती झाली.’’

‘लेखक आपल्या भेटीला’ उपक्रमांतर्गत गुरुवारी (ता. १८) भेटणारे लेखक
- ‘गोष्ट पैशापाण्याची’: लेखक प्रफुल्ल वानखेडे
- ‘अक्की : द स्टोरी ऑफ विल, सन अॅण्ड क्लिक’ : या पुस्तकाचा नायक अक्षय परांजपे
- ‘ताल भवताल’ : लेखक दादाभाऊ गावडे
- ‘ऐतिहासिक वाडे’ : लेखक सुमीत डेंगळे