पुणे, ता. १७ ः दुचाकीच्या धडक बसल्याने पादचारी महिलेचा मृत्यू झाल्याची घटना गणेशखिंड रस्ता परिसरात घडली. या प्रकरणी चतुःशृंगी पोलिसांनी एका दुचाकीस्वारावर गुन्हा दाखल करण्यात आला होता.
सुनीता संतोष अलकुंटे (वय ४०, रा. वडारवाडी, शिवाजीनगर) असे मृत्युमुखी पडलेल्या महिलेचे नाव आहे. याबाबत अलकुंटे यांचा मुलगा रोहित (वय २०) याने चतुःशृंगी पोलिस ठाण्यात फिर्याद दिली आहे. पोलिसांनी दिलेल्या माहितीनुसार, सुनीता अलकुंटे मॉडेल कॉलनी भागात घरकाम करतात. त्या २१ नोव्हेंबर रोजी सकाळी दहाच्या सुमारास शासकीय अभियांत्रिकी महाविद्यालय परिसरातून गणेशखिंड रस्त्याकडे निघाल्या होत्या. त्यावेळी भरधाव दुचाकीची त्यांना धडक बसली. त्यांना गंभीर दुखापत झाली. उपचारादरम्यान त्यांचा मृत्यू झाला. पोलिस उपनिरीक्षक मनीषा जाधव तपास करत आहेत.