पुणे, ता. १८ ः गॅस पुरवठा खंडित करण्याच्या बतावणीने ज्येष्ठ नागरिकाची २३ लाख रुपयांची फसवणूक करण्यात आल्याचा प्रकार उघडकीस आला आहे. गॅस देयक न भरल्याने पुरवठा खंडित करण्यात येईल, अशी बतावणी चोरट्यांनी त्यांच्याकडे केली होती.
या प्रकरणी सायबर चोरट्यांवर चतुःशृंगी पोलिस ठाण्यात गुन्हा दाखल करण्यात आला आहे. याबाबत एका ८३ वर्षीय ज्येष्ठ नागरिकाने फिर्याद दिली आहे. तक्रारदार ज्येष्ठ नागरिक हे औंध भागात राहायला आहेत. सहा डिसेंबरला सायबर चोरट्यांनी त्यांच्या मोबाईल क्रमांकावर संपर्क साधला. गॅस देयक न भरल्याने पुरवठा खंडित करण्यात येईल, अशी बतावणी केली. चोरट्यांनी त्यांच्या मोबाईल क्रमांकावर एक लिंक पाठविली. ही लिंक उघडून माहिती पाठवा, असे चोरट्यांनी त्यांना सांगितले.
ज्येष्ठ नागरिकाने लिंक उघडल्यानंतर त्यांच्या बँक खात्यातून २२ लाख ९४ हजार रुपये चोरट्यांच्या खात्यात जमा झाले. फसवणूक झाल्याचे उघडकीस आल्यानंतर त्यांनी पोलिसांकडे तक्रार दिली. गुन्हे शाखेच्या पोलिस निरीक्षक अश्विनी ननावरे तपास करत आहेत.

गुंतवणुकीच्या आमिषाने २६ लाखांची फसवणूक
सायबर चोरट्यांनी मुंढवा भागातील एकाची २६ लाख रुपयांची फसवणूक केल्याचा प्रकार उघडकीस आला आहेत. याबाबत एका ४७ वर्षीय तक्रारदाराने मुंढवा पोलिस ठाण्यात फिर्याद दिली आहे. ऑनलाइन पद्धतीने काम केल्यास चांगला परतावा मिळेल, तसेच आभासी चलनात गुंतवणुकीवरही परतावा मिळेल, असे आमिष दाखवून चोरट्यांनी त्यांना जाळ्यात ओढले. त्यानंतर चोरट्यांनी सुरुवातीला काही रक्कम भरण्यास सांगितले. चोरट्यांच्या खात्यात रक्कम जमा केल्यानंतर त्यांना परतावा मिळाल्याचे भासविले. त्यानंतर चोरट्यांच्या खात्यात आणखी रक्कम त्यांनी गुंतविली. चोरट्यांनी त्यांना परतावा दिला नाही. वरिष्ठ पोलिस निरीक्षक स्मिता वासनिक तपास करत आहेत.

महिलेची आठ लाखांची फसवणूक
शेअर बाजारात गुंतवणुकीच्या आमिषाने एका महिलेची आठ लाख १५ हजार रुपयांची फसवणूक करण्यात आल्याचा प्रकार उघडकीस आला आहे. याबाबत एका महिलेने सिंहगड रस्ता पोलिस ठाण्यात फिर्याद दिली आहे. तक्रारदार महिला सिंहगड रस्ता भागात राहायला आहेत.