पुणे, ता. १८ : शहरातील पादचारी भुयारी मार्गांमध्ये प्रकाश व्यवस्था, स्वच्छता, सुरक्षेच्या दृष्टीने त्वरित अत्यावश्यक कामे करावीत आणि त्याचा अहवाल सादर करावा, असे आदेश प्रकल्प विभागाने संबंधित अभियंत्यांना दिले आहेत. त्यामुळे प्रत्यक्षात सुधारणा कधीपर्यंत होणार? याकडे लक्ष लागले आहे.
पुणे महापालिकेने शहराच्या विविध भागातील महत्त्वाचे चौक, मोठे रस्ते या ठिकाणी पादचाऱ्यांच्या सोईसाठी भुयारी मार्ग बांधले आहेत. यातील जंगली महाराज रस्त्यावरील भोसले भुयारी मार्गात अस्वच्छता, पाणी गळती आहे. अंधार असल्याने नागरिकांना तो असुरक्षित वाटतो. तसेच विमाननगर येथील भुयारी मार्गाची अशीच अवस्था असून, हा भुयारी मार्ग म्हणजे मद्यपींचा अड्डा झालेला आहे. दिवसाढवळ्या याठिकाणी तळीराम मद्य पित असताना त्यांच्यावर महापालिका, पोलिसांकडून कारवाई होत नाही. कसबा पेठ व शनिवार पेठेला जोडणाऱ्या शनिवारवाडा येथील भुयारी मार्गातील अस्वस्थता, अंधारामुळे महिला, विद्यार्थी या भुयारी मार्गाचा वापर करत नाहीत. बिबवेवाडीत माणिक दुगड भुयारी मार्ग हा तळीरामांचा अड्डा झालेला आहे. ‘सकाळ’ने केलेल्या पाहणीमध्ये शहरातील भुयारी मार्गांमधील विदारक वास्तव समोर आले. पादचाऱ्यांऐवजी समाजकंटकांकडूनच या भुयारी मार्गाचा वापर जास्त होत असल्याचे दिसून आले आहे.

शहरातील प्रत्येक पादचारी भुयारी मार्गाची पाहणी करून तेथे तातडीने सुधारणा करण्याचे आदेश दिले आहेत. यामध्ये आवश्‍यक स्थापत्य विषयक कामे करणे, क्षेत्रीय कार्यालयांना सांगून दैनंदिन स्वच्छता करणे, विद्युत विभागाच्या अभियंत्‍यांनी दिवे, सीसीटीव्ही दुरूस्त करून भुयारी मार्गात प्रकाश व्यवस्था करण्यास सांगितले आहे. त्याचा लेखी अहवालही मागविला आहे.
- दिनकर गोजार,
मुख्य अभियंता, प्रकल्प विभाग