पुणे, ता. २६ ः सिंहगड रस्ता भागातील धायरीतून दुचाकी चोरणाऱ्यांना पोलिसांनी अटक केली. चोरट्यांकडून दोन दुचाकी जप्त करण्यात आल्या आहेत. ओंकार संतोष सातपुते (वय २०, रा. लायगुडे वस्ती, धायरी) आणि साईराज अतुल तावरे (वय १८, रा. कांबळे वस्ती, धायरी) अशी अटक करण्यात आलेल्यांची नावे आहेत. धायरी परिसरातून दोन दुचाकी चोरीला गेल्या होत्या. या प्रकरणी नांदेड सिटी पोलिस ठाण्यात गुन्हा दाखल आहे. त्यानुसार पोलिस दुचाकी चोरट्यांच्या मागावर होते. सराईत चोरटे सातपुते आणि तावरे यांनी दुचाकी चोरीचे गुन्हे केल्याची माहिती तपास पथकातील पोलिस कर्मचारी मोहन मिसाळ आणि शिवा क्षीरसागर यांना मिळाली. त्यानंतर पोलिसांनी सापळा लावून दोघांना पकडले. चौकशीत दोघांनी दुचाकी चोरीची कबुली दिली.