पुणे, ता. २७ : शाहू महाराजांनी १९०२ मध्ये मागासवर्गीयांसाठी आरक्षण लागू करून सामाजिक समतेचा पाया घातला, तसेच वसतिगृह आणि शिक्षणसुविधा उपलब्ध करून दिल्यामुळे हजारो विद्यार्थी शिकू शकले, असे मत ‘बार्टी’च्या निबंधक इंदिरा अस्वार यांनी व्यक्त केले.
डॉ. बाबासाहेब आंबेडकर संशोधन व प्रशिक्षण संस्थेतर्फे (बार्टी) राजर्षी छत्रपती शाहू महाराज यांच्या जयंतीनिमित्त अभिवादन कार्यक्रमाचे आयोजन करण्यात आले होते. छत्रपती शाहू महाराज आणि भारतरत्न डॉ. बाबासाहेब आंबेडकर यांच्या प्रतिमांना पुष्पहार अर्पण करून अभिवादन करण्यात आले. या वेळी निबंधक इंदिरा अस्वार, वृषाली शिंदे, अनिल कारंडे, शुभांगी पाटील, योगिता झानपुरे आदी उपस्थित होते, तसेच राजर्षी शाहू महाराज यांच्या दुर्मीळ छायाचित्रांचे प्रदर्शन आयोजित करण्यात आले होते. कार्यक्रमाचे सूत्रसंचालन रामदास लोखंडे यांनी केले, तर आभार वैशाली खांडेकर यांनी मानले.