पुणे, ता. २७ : पुणे बार असोसिएशन आणि महाराष्ट्र-गोवा वकील परिषदेच्या वतीने रविवारी (ता. २९) ‘न्यायव्यवस्थेतील पारदर्शकता’ या विषयावर परिसंवादाचे आयोजन केले आहे. कोथरूडमधील एमआयटी महाविद्यालयाच्या सभागृहात सकाळी साडेदहा वाजता हा परिसंवाद होणार आहे.
यासाठी प्रमुख पाहुणे म्हणून सर्वोच्च न्यायालयाचे न्यायमूर्ती उज्जल भुयान उपस्थित राहणार असल्याची माहिती असोसिएशनचे अध्यक्ष अ‍ॅड. हेमंत झंजाड यांनी दिली. कार्यक्रमात मुंबई उच्च न्यायालयाच्या न्यायमूर्ती रेवती मोहिते-डेरे, न्यायमूर्ती संदीप मारणे, न्यायमूर्ती अरीफ डॉक्टर, तसेच अतिरिक्त महाधिवक्ता अनिल सिंग आणि वकील परिषदेचे अध्यक्ष अ‍ॅड. विठ्ठल कोंडे-देशमुख सहभागी होणार आहेत. यावेळी सर्वोच्च न्यायालयाचे माजी न्यायमूर्ती अभय ओक यांचा विशेष सन्मान होईल. तसेच अ‍ॅड. श्रीकांत कानेटकर यांच्यासह इतर काही ज्येष्ठ विधिज्ञांनाही गौरविण्यात येणार आहे. दुपारी एक वाजता माजी न्यायमूर्ती ओक ‘न्यायव्यवस्थेतील पारदर्शकता’ या विषयावर व्याख्यान देतील. त्यानंतर दुपारी तीन वाजता झिशान पठाण यांचे ‘विधीकौशल्य व आधुनिक तंत्रज्ञानाचा प्रभावी वापर’ या विषयावर मार्गदर्शन होणार आहे.