पुणे, ता. २६ ः बिबट्या, कुत्र्यांनंतर आता पुणे विमानतळाच्या धावपट्टीजवळ मोरांचा वावरदेखील आढळून आला. शनिवारी पुण्याहून दिल्लीला जाणाऱ्या स्पाइसजेटच्या (एसजी-९६७) विमानाच्या प्रवाशाने धावपट्टीपासून काही मीटरवर तीन मोरांना गवताळ भागात वावरताना पाहिले. विमान टॅक्सी वेवरून धावपट्टीच्या दिशेने जाताना त्यांनी हे दृश्य पाहिले आहे. मोरांसारखा मोठा पक्षी धावपट्टीजवळ आढळून आल्याने पुन्हा एकदा प्रवासी सुरक्षिततेवर प्रश्‍नचिन्ह निर्माण झाले आहे. हे पक्षी धावपट्टीवर दाखल झाले तर विमान व प्रवासी यांची सुरक्षा धोक्यात येण्याची शक्यता नाकारता येत नाही.
पुणे विमानतळावर शनिवारी सकाळी सात वाजून २० मिनिटांच्या सुमारास पुण्याहून दिल्लीला जाणाऱ्या स्पाइसजेटच्या विमानात बाणेर येथील गौरव चत्तुर हे प्रवास करीत होते. विमान टॅक्सी वेवरून धावपट्टीच्या दिशेने जात असताना खिडकीतून तीन मोरांना त्यांनी पाहिले. हे मोर धावपट्टीपासून काहीच मीटर अंतरावर असल्याचा दावा त्यांनी केला आहे. धावपट्टीच्या जवळ मोठ्या प्रमाणात गवताळ भाग आहे. त्यामुळे येथे मोरांचा वावर अधिक असल्याचे आढळून आले. पुणे विमानतळावर आतापर्यंत कुत्रा, बिबट्या, रानमांजर, ससे आणि आता मोर आढळून आले आहेत. यामुळे विमानसेवेच्या सुरक्षेवर प्रश्‍नचिन्ह निर्माण होत आहे.
------------------
‘‘शनिवारी मी सकाळी पुण्याहून दिल्लीला जात होतो. त्यावेळी धावपट्टीजवळ मला तीन मोर आढळून आले. हे हवाई दलाचे बेस स्टेशन असल्याने फोटो काढला नाही. मात्र, याची माहिती विमानतळ प्रशासनाला मिळावी म्हणून एक्सवरून माहिती दिली. माझ्या एक्सवरील पोस्टनंतर विमानतळ प्रशासनाकडून कोणताही संपर्क साधण्यात आलेला नाही.
गौरव चत्तुर, प्रवासी
-----------
‘‘या घटनेची माहिती नाही. शिवाय पुणे विमानतळाची धावपट्टी ही हवाई दलाच्या अखत्यारीत येते. त्यामुळे याबाबत त्यांनाच अधिक माहिती असणार आहे.
संतोष ढोके, विमानतळ संचालक, पुणे