पुणे, ता. ३१ : ‘सुझुकी स्कूल ऑफ व्हायोलिन’च्या २५ व्या वर्धापन दिनानिमित्त एका विशेष कार्यक्रमाचे आयोजन करण्यात आले आहे. हा कार्यक्रम शिवाजीनगर येथील मॉडर्न कॉलेजच्या सभागृहात शनिवारी (ता. २) सायंकाळी पाच वाजता होणार आहे. यावेळी १०० हून अधिक विद्यार्थी व्हायोलिन वादनाची अनोखी मैफल सादर करणार आहेत.
या कार्यक्रमात पाश्चात्त्य शास्त्रीय संगीतापासून लोकप्रिय बॉलिवूड गाणी आणि भारतीय रागसंगीतापर्यंतचा सुरेल प्रवास अनुभवता येईल. गेल्या २५ वर्षांपासून रमा चौबे व्हायोलिन या वाद्याच्या प्रचार आणि प्रसारासाठी अथक प्रयत्न करत आहेत. सुझुकी स्कूल ऑफ म्युझिकने पुण्याला आणि जगाला ५०० हून अधिक तरुण आणि प्रतिभावान व्हायोलिनवादक दिले आहेत. लहान मुलांमध्ये विशेषतः तीन वर्षांच्या मुलांमध्ये संगीताची आवड निर्माण करण्याच्या दृष्टिकोनातून या शाळेची स्थापना केली होती. सुझुकी पद्धतीचा अवलंब करून, या शाळेने केवळ तांत्रिक कौशल्येच नव्हे, तर विद्यार्थ्यांमध्ये संगीताची सखोल संवेदनशीलता वाढवली आहे. शाळेचे अनेक माजी विद्यार्थी आता जगभरातील नामांकित ऑर्केस्ट्रामध्ये आपली कला सादर करत आहेत.
या कार्यक्रमासाठी प्रवेश विनामूल्य आहे. संगीतप्रेमी आणि संगीत शिकू इच्छिणाऱ्यांसाठी हा कार्यक्रम संगीतामधील संस्कार, शिस्त आणि सौंदर्याचा अनुभव देणारा ठरणार आहे.