पुणे, ता. ३१ ः श्रीमंत दगडूशेठ हलवाई गणपती मंडळापाठोपाठ आता अखिल मंडई मंडळ व श्रीमंत भाऊसाहेब रंगारी गणपती मंडळानेही मानाच्या गणपतीपाठोपाठ लगेचच विसर्जन मिरवणुकीत सहभागी होण्याचा निर्णय घेतला आहे. यंदा खग्रास चंद्रग्रहणामुळे दोन्ही मंडळांनी हा निर्णय घेतलेला असला, तरीही तो कायमस्वरूपी असेल, अशी भूमिका दोन्ही मंडळांनी गुरुवारी पत्रकार परिषदेत मांडली. दोन्ही प्रमुख मंडळांच्या या भूमिकेमुळे दरवर्षी विसर्जन मिरवणुकीस होणार विलंब यंदा कमी होण्याची शक्‍यता आहे.
अखिल मंडई मंडळाचे अध्यक्ष अण्णा थोरात, श्रीमंत भाऊसाहेब रंगारी गणपती मंडळाचे अध्यक्ष संजू जावळे यांनी पत्रकार परिषदेत ही माहिती दिली. यावेळी जिलब्या मारुती मंडळाचे भूषण पंड्या, मंडई मंडळाचे विश्‍वस्त विश्‍वास भोर, संजय मते आदी मंडळांचे प्रमुख पदाधिकारी उपस्थित होते. थोरात म्हणाले, ‘‘यंदा विसर्जन मिरवणुकीच्या दुसऱ्या दिवशी चंद्रग्रहण असल्यामुळे यंदा मिरवणूक लवकर संपवावी लागणार आहे. त्यामुळे अखिल मंडई मंडळ, श्रीमंत भाऊसाहेब रंगारी मंडळ या दोन्ही मंडळांसह काही प्रमुख मंडळे मानाच्या गणपतीनंतर लगेचच विसर्जन मिरवणुकीत सहभागी होतील. आमची ही भूमिका फक्त यंदासाठी नव्हे, तर यापुढे कायम असेल. दरवर्षी आमचे मंडळ सायंकाळी सात वाजता मंडळातून निघते. मात्र, बेलबाग चौकापर्यंत पोहोचण्यासाठी पहाटेचे तीन वाजतात. पोलिसांकडून सहकार्य होत नाही. आम्ही श्रीमंत दगडूशेठ हलवाई मंडळाअगोदरही जाऊ शकतो किंवा नंतरही जाऊ शकतो.’’
--------------
* म्हणून यंदा लवकर विसर्जन
यंदा २७ ऑगस्ट रोजी गणेशोत्सवास सुरुवात होणार आहे, तर ६ सप्टेंबर रोजी अनंत चतुर्दशी आहे. दुसऱ्या दिवशी सात सप्टेंबरला खग्रास चंद्रग्रहण आहे. दुपारी १२ वाजून ३७ मिनिटांनी ग्रहणाचे वेद सुरू होतात. ग्रहणाच्या वेळी देवदेवतांच्या मूर्ती ओल्या कापडाने झाकण्याची प्रथा आहे. त्यामुळे प्रत्येक मंडळाला विसर्जन मिरवणूक दुपारी बाराच्या आत संपवून ‘श्रीं’ची मूर्ती मंदिरात ठेवावी लागणार असल्याचे थोरात यांनी सांगितले.
-----------
वेळेत दर्शन शक्य
अनंत चतुर्दशीच्या दिवशी शहरातील मानाच्या पाच गणपतींचे विसर्जन होते, तर अखिल मंडई मंडळ, श्रीमंत भाऊसाहेब रंगारी गणपती मंडळ, बाबू गेनू मंडळ, जिलब्या मारुती मंडळासह शहरातील प्रमुख गणेशोत्सव मंडळांना विसर्जनासाठी दुसऱ्या दिवसापर्यंत वाट पाहावी लागते. दगडूशेठ हलवाई, मंडई मंडळाच्या ‘श्रीं’चे दर्शन घेण्यासाठी भाविक पहाटेपर्यंत विसर्जन मार्गाकडे डोळे लावून बसतात. भाविकांच्या भावनेची दखल घेत श्रीमंत दगडूशेठ मंडळाने दोन वर्षांपूर्वी दुपारीच विसर्जन मिरवणुकीत सहभागी होण्याचा पायंडा पाडला. त्यामुळे नागरिकांना वेळेत दर्शन घेणे शक्‍य झाले.
----------
विसर्जन मिरवणूक दृष्टिक्षेप...
- मानाच्या गणपतींनंतर मिरवणुकीत सहभागी होण्यासाठी क्रमवारी ठरविणार
- यंदा ढोल पथक, वाद्यवृंदांची संख्या कमी करण्यावर मंडळे देणार भर
- टिळक, कुमठेकर, केळकर रस्त्यासह प्रमुख मंडळांना लवकर मिरवणूक सुरू करण्याची करणार विनंती
- डीजेचा वापर न करण्याचे मंडळांना करणार आवाहन
------------